Kompleta Estrutura Governu Molok Diskute OJE 2019 Featured

By INDEPENDENTE Outubru 18, 2018 7372

DILI: Estrutura membru governu ne’ebé sei inkompletu presiza halo kompletu antes tama ba diskusaun Orsamentu Jerál Estadu (OJE) 2019. Nune’e, labele prejudika ba ezekusaun orsamentu.

Observadór Polítika Universidade Nasionál Timor Lorosa’e (UNTL), Víctor Soares hateten, bainhira membru governu la kompletu nafatin molok diskusaun OJE 2019, sei difikulta implementasaun programa governu nian.

Nia dehan, kandidatu membru governu na’in sia ne’ebé seidauk simu pose to’o agora, haree husi prátika difikulta ba ezekusaun orsamentu.

Ba membru governu sira ne’ebé hetan pendente husi Prezidente Repúblika atu troka kompeténsia Komisaun Polítika Nasionál no lider másimu sira husi PLP, CNRT, no KHUNTO ne’ebé forma koligasaun Aliansa Mudansa ba Progresu (AMP).

Nia dehan, enkuantu lider bankada sira dudu membru governu na’in sia bainhira prezidente nafatin iha dúvida ho sira kapasidade, lideransa no sira-nia komportamentu, automatikamente tenke iha mudansa polítika atu bele propoin fali ema seluk nia naran, nune’e bele fó pose iha tempu badak.

Sosiedade Sivíl Husu Diálogu

Entretantu, sosiedade sivíl husu ba Primeiru Ministru no Presidente Repúblika tenke iha vontade para atu loke diálogu.

Tuir sosiedade sivíl sira membru governu seidauk kompletu ne’e loloos atu hataan maka Primeiru Ministru no Prezidente Repúblika. Maibé iha situasaun polítika ne’e Prezidente Repúblika iha pozisaun ida, Primeiru Ministru pozisaun ida, no partidu sira ne’ebé manan iha eleisaun mós iha pozisaun ida. Tanba ne’e prosesu ne’e sai naruk liután.

Peskizadór La’o Hamutuk, Celestino Gusmão hateten, presiza iha diálogu saudavel ne’ebé evita atu kritika nakloke iha públiku entre polítiku sira, la’ós atu para kritika balun ne’e di’ak kona-ba “cheek and balance” maibé ko’alia ba malu kontaktu instituisaun entre Primeiru Ministru ho Prezidente Repúblika.

Iha fatin ketak, peskizadór AJAR, Inocêncio de Jesus Xavier hateten, kompeténsia Prezidente Repúblika nian tuir konstituisaun iha direitu prerrogativa atu fó pose ka la fó pose. Se maka bele substitui membru governu foun ne’e partidu koligasaun sira liu husi Primeiru Ministru atu haree ema se maka bele troka lista kandidatu na’in sia ne’ebé seidauk hetan pose.

Tuir nia labele husik situasaun ne’e maibé Estadu tenke iha alternativa maka Prezidente Repúblika ho Primeiru Ministru iha diálogu hodi hatudu rezultadu ba membru governu na’in sia ne’ebé la hetan pose.

Nia hatutan, bainhira AMP la satisfás ho desizaun Prezidente Repúblika ba Tribunál atu hetan ninia justifikasaun ho razaun fundamentu se mak sala iha pozisaun ne’e.

Rate this item
(0 votes)

Independente Digital TV