Portavós Asosiasaun HAK, Marina Galucho hatete, apresia no louva tebes relasaun diplomasia polítika mutual entre Japaun no Timor-leste ne’ebé hahú iha 2002 to’o agora.

Apoiu oioin ne’ebé gradualmente mai husi Governu Japaun ba povu Timor iha tinan 16 nia laran, no apoiu hirak ne’e sei kontinua iha futuru liu husi ezijénsia dezenvolvimentu sira.

Maski nune’e, iha lidun balun inan-feto sira hafalun ho fuan fitar ne’ebé uluk sofre husi aktu militár Japaun iha tempu segundu funu mundiál (1942-1945), daudaun ne’e sei kontinua halerik ho sira nia sentimentu no ko'us mesak todan pasadu iha nia moris durante tinan naruk nia laran.

“Iha nia peskiza deteta ema na'in 20 maibé sanulu mate tiha ona hela de’it sanulu, inan-feto sira ne’e agora iha Munisípiu Kovalima na’in haat, Manufahi tolu, Vikeke ida no iha Ermera na’in rua”, dehan nia, iha Edifísiu HAK, Faról-Dili, foin lalais ne’e.

Dadus ne'ebé HAK halo deskobrimentu, feto na'in 20 konsege ho aten brani haktuir sai sira nia istória nakukun ba hahalok imorál no brutalizmu husi tropa japonés. Vítima sira agora iha kondisaun miseravel husi aspetu fíziku no psikolojia, tanba hetan sofrimentu oioin ne’ebé estrimamente nakonu ho depresaun estraordináriu nia laran.

Tanba ne’e, fó hanoin ba Ministru Negósiu Estranjeiru Japaun, Taro Kono, nia-prezensa iha Timor husi atu lori lia tatoli ne’e ba Primeiru Ministru, Sinzho Abe, atu prudentimente ho fuan boot hodi labele ignora vítima ho família sira ne’ebé enfrenta situasaun kruél.

Relasaun polítika diplomasia rai rua ne’ebé metin, maibé la labele abandona vítima Jugun Ianfu, la'ós de’it Timor maibé mós iha fatin seluk hanesan Koreia Súl, Tailándia, Filipina, Malázia, Indonézia no Japaun rasik, ne'ebé agora daudaun ne’e hela iha situasaun miseravel laran.

Iha fatin hanesan, tuir Vise-Diretór Asosiasaun HAK, Xisto dos Santos hatete, Governu Timor-Leste no Japaun iha kooperasaun bilaterál di'ak tebes iha aspetu dezenvolvimentu, maibé sei la taka dalan atu haluha krime pasadu sira.