Antes ne’e, Prezidente Parlamentu Nasionál, Arão Noe de Jesus, promete atu dada hikas karreta Prado husi eis-deputadu sira nia liman ho asaun forsada.

Maski nune’e, to’o agora seidauk realiza, tanba ne’e MUTL hakarak halo asaun ida hodi obriga PN atu implementa duni sira ninia promesa.

Membru MUTL, Marçal dos Santos Pereira hatete, promesa ne’ebé Prezidente PN halo ne’e tuir loloos tenke realiza duni labele bosok de’it públiku.

Nia husu ba Prezidente PN atu hasai despaxu imediatamente ba Polisia atu bele rekolla ona karreta tuan hodi entrega ba PN

“Lae husu mai ami estudante sira mak ba direita eis-deputadu sira nia rezidénsia hodi foti karreta ne’e”, tenik nia, iha kampus UNDIL, horisehik.

Iha momentu ida ne’e Parlamentu Nasionál debate hela sira nia orsamentu privativu ba 2019 nian iha ne'e sei prevé osan ba sosa karreta foun ba deputadu 65 ne’ebé eleitu iha V lejizlatura ne’e.

“Ami husi MUTL sei kontinua kontra desizaun PN nian atu sosa fali karreta foun ba deputadu eleitu sira. Ami husu atu foti karreta Prado hirak ne’e hodi entrega ba sira atu uza halo sira nia knaar”, dehan Marçal.

Tuir nia, karreta tuan hirak ne’e kondisaun sei di'ak hela, tanba ne’e la presiza atu sosa karreta foun.

Nu’udar reprezentante povu, deputadu sira tuir loloos tenke fó importánsia ba nesesidade báziku povu nian, laos tau uluk maka sira-nia interese ba hetan priviléjiu.