“Ha’u fiar katak iha tempu ida ne’e ita sei rezolve”, dehan Xefe Governu, iha Palásiu Prezidensiál, Bairru-Pité, horisehik.
PM Taur dehan, kandidatu membru governu na’in sia ne’ebé seidauk kompletu ne’e sei afeta ba orsamentu 2019 nian, maibé governu halo esforsu tomak atu minimiza impaktu iha ezekusaun orsamentál nian.
Kandidatura membru governu na'in sia ne’ebé to’o ohin loron seidauk simu pose husi Presidente Repúblika (PR) lori ona tempu naruk, Parlamentu Nasionál rasik mós seidauk hetan informasaun.
Antes ne’e, Vise-Prezidente PN, Maria Angelina Sarmento hatete, kandidatura membru governu na'in sia ne’ebé naran pondera hela husi Xefe Estadu to’o ohin loron laiha informasaun.
“Kandidatura membru governu na'in sia ami seidauk simu informasaun”, dehan nia.
Nune’e, Prezidente Bankada Partidu CNRT, Duarte Nunes hatete, kandidatura membru governu na'in sia ne’ebé maioria mai husi partidu CNRT entrega tomak ona ba Primeiru Ministru (PM) atu buka solusaun.
“Hanesan partidu ami kontinua mantein nafatin ami nia ema”, dehan nia.
Nia hatete, Primeiru Ministru, Taur Matan Ruak, kada semana halo enkontru ho Xefe Estadu hodi ko'alia mós situasaun ne’e maibé laiha progresu.
Husi kandidatura ne’e ema na'in hitu husi CNRT, tanba ne’e Xefe Governu mós relata informasaun mai partidu, maibé mós husu atu mantein nafatin kuadru hirak ne’e tanba laiha fundamentu atu troka sira.
