Antes ne’e, Xefe Estadu simu ona konvite husi Vatikanu atu ba tu’ir peregrinasaun iha Roma ne’ebé tuir planu sei ba iha loron 23 Novembru oin mai.

Tanba ne’e, Presidente Repúblika mós iha ona planu atu aproveita momentu ne’e hodi konvida mós Amu Papa atu mai vizita sarani Katólika sira iha Timor-Leste.

Maski nune'e, Deputadu PLP, Sabino Soares ‘Guntur’ hatete, iha fulan hirak liu ba partidu bloku Governu Aliansa Mudansa ba Progresu (AMP) vota kontra dezlokasaun ne’e tanba desizaun polítika.

Nia konsidera Xefe Estadu iha tusan ba VIII Governu Konstitusionál, tanba to’o ohin loron seidauk fó pose ba kandidatu membru governu na'in sia (9) ne’ebé Primeiru Ministru rasik indijita.

Prosesu hirak ne’e akontese presiza Xefe Estadu atu rezolve, tanba iha nasaun ne’e iha órgaun soberania haat ne’ebé depende ba malu. Ne’e duni, kuandu sira halo tusan ba malu sei implika ba sira nia liberdade sirkulasaun no desizaun polítika ruma.

Tanba ne’e, PR tenke obediese ba proposta Primeiru Ministru nian atu fó pose ba membru governu na'in sia ne’ebé seidauk simu pose atu bele kompleta ona estrutura Governu.

Deputadu ne’e duvida tanba to’o oras ne’e membru governu na'in sia ne’ebé seidauk simu pose ne’e deskonfia komete krime, maibé Tribunál rasik hasai notifikasaun ema sira ne’e laiha problema ho Tribunál.

Tanba ne’e, atu konsolida Estadu ne’e órgaun soberania haat tenke hamutuk atu labele implika prosesu dezenvolvimentu.

“Xefe Estadu nia viajen atu ba ka la ba Roma-Itália ne’e depende desizaun polítika husi AMP nian”, dehan nia, iha Uma Fukun PN, horisehik.

Guntur hatete, Xefe Estadu viajen ba estranjeiru atu halo kooperasaun bilaterál ho nasaun seluk, maibé realidade iha rai laran problema interna sei boot tebes.

Antes ne’e, Deputadu Partidu Demokrátiku (PD), Mariano ‘Assanami’ Sabino hatete, Prezidente Repúblika ba iha estranjeiru ne’e lori Estadu hodi hala’o kooperasaun bilaterál ho nasaun seluk, hanesan lasu amizade atu hametin relasaun di'ak iha aspetu hotu-hotu.

“Ita nia diverjénsia polítika iha rai laran ita mak tenke jere no rezolve rasik, ita labele lori ida ne’e hodi impede fali Xefe Estadu nia viajen”, dehan nia.

Iha prosesu funu ba libertasaun nasaun barak fó nia kontribuisaun ba nasaun no povu, entaun ohin loron ukun-aan ona presiza Estadu kontinua hametin kooperasaun bilaterál hodi hametin liután relasaun entre Timor ho nasaun seluk.