Peskizadór Asia Justice And Rights (AJAR), Inocêncio de Jesus Xavier, husu ba kandidatu membru governu na’in sia ne’ebé to’o oras ne’e seidauk simu pose di’ak liu fila fali ba deputadu iha Parlamentu Nasionál.
“Husu ba sira na’in sia mós se sente ba sira ne’ebé ukun tiha ona no ba sira ne’ebé la ukun, deskulpa karik ita boot sira seidauk iha tempu. Desizaun maka ida ne’e, ita boot sira bele ba fali Parlamentu Nasionál hanesan deputadu baibain”, tenik nia iha knaar fatin Faról, horisehik.
Karik naran la tama lista deputadu be;e ba fali halo servisu ruma iha komunidade, atu ajuda sira na’in sia ne’e iha kapasidade intelektuál bele servisu hamutuk no organiza komunidade sira atu asesu ba informasaun ba dezenvolvimentu rai laran.
Serve Estadu la'ós tenke sai ba ministru no deputadu, maibé bele halo servisu seluk hanesan Xefe Negosiadór Prinsipál, Xanana Gusmão, la ministru maibé halo servisu ba Fronteira Marítima.
Ne’e duni, sira na’in sia mós tenke haree modelu ne’ebé Xanana hatudu hodi lakohi simu pose tanba solidária, maibé agora sira na’in lakohi solidária fali no Xanana mesak ba li'ur.
Antes ne’e, Primeiru Ministru (PM), Taur Matan Ruak, kompromete sei rezolve iha tempu badak.
Xefe Governu rekoñese kandidatu membru governu na’in sia ne’ebé seidauk kompletu ne’e sei afeta ba orsamentu 2019 nian, maibé governu halo esforsu tomak atu minimiza impaktu iha ezekusaun orsamentál nian.
Kandidatura membru governu na'in sia ne’ebé to’o ohin loron seidauk simu pose husi Presidente Repúblika (PR) lori ona tempu naruk, Parlamentu Nasionál rasik mós seidauk hetan informasaun.
Antes ne’e, Vise-Prezidente PN, Maria Angelina Sarmento hatete, kandidatura membru governu na'in sia ne’ebé naran pondera hela husi Xefe Estadu to’o ohin loron laiha informasaun.
“Kandidatura membru governu na'in sia ami seidauk simu informasaun”, dehan nia.
Nune’e, Prezidente Bankada Partidu CNRT, Duarte Nunes hatete, kandidatura membru governu na'in sia ne’ebé maioria mai husi partidu CNRT entrega tomak ona ba Primeiru Ministru (PM) atu buka solusaun.
“Hanesan partidu ami kontinua mantein nafatin ami nia ema”, dehan nia.
Nia hatete, Primeiru Ministru, Taur Matan Ruak, kada semana halo enkontru ho Xefe Estadu hodi ko'alia mós situasaun ne’e maibé laiha progresu.
Husi kandidatura ne’e ema na'in hitu husi CNRT, tanba ne’e Xefe Governu mós relata informasaun mai partidu, maibé mós husu atu mantein nafatin kuadru hirak ne’e tanba laiha fundamentu atu troka sira.
