Kompozisaun ne’e lideradu husi bankada Opozisaun hanesan FRETILIN no Partidu Demokratiku (PD).

Iha estrutura KIP ne’e Prezidente eleitu Antoninho Bianco husi FRETILIN, vise Prezidente husi PD Adriano do Nascimento no Sekretaria meza Maria Ana Bele husi FRETILIN.

Prezidente eleitu Komisaun Inkeritu Parlamentar (KIP) Antoninho Bianco hateten, Parlamentu Nasionál fó ona pose ba estrutura hamutuk 22, efetivu 11 no suplente nain 11.

Husi total númeru ne’e, deputadu  FRETILIN nain 4, CNRT 3, PLP 2, KHUNTO 1 no PD 1 mak sei hala’o funsaun iha KIP ne’e rasik.

“iha komisaun inkeritu parlamentar ne’e ami hala’o funsaun tuir lei hodi halo akompañamentu ba pagamentu projeu 142, ne’ebé deskonfia fahe de’it’’, dehan nia iha PN horisehik.

Antoninho  hatutan, KIP ne’e sei hala’o nia funsaun durante fulan rua nia laran ka hala’o servisu loron 60 nia laran hodi haree ba prosesu hothotu ne’ebé iha relasaun ho prosesu aprovijionamentu finansas públiku nian.

Komisaun ne’e mos seidauk hala’o nia servisu, tanba foin mak simu pose, nune’e foin instala ofice no ekipamentu servisu.

Bainhira remata,  komesa tuun  ba baze hodi fiskaliza projetu hotu-hotu ne’ebé uza osan estadu nian.

 Informa Komisaun  ba PR Lu OLo

Iha Tersa (30/10) Prezidente Parlamentu Nasional (PPN)  Ãrao Noe relata komisaun nee ba Prezidente Republika (PR) Francisco Guterres Lu Olo.

“Ha’u mai relata ba Prezidente Repúblika kona-ba atividade Parlamentu nian ne’ebé durante ne’e, inklui informa mos kona ba pose ba Komisaun Inkeritu Parlamentar (KIP),” hateten Ãrao hafoin  enkontru semanál ho Prezidente Repúblika.

Mandatu komisaun nee iha primeiru mandatu ba loron 60,  depois karik la konklui  sira nia servisu, bele husu estende tan loron 30, ho metade primeiru mandatu.