Iha serimónia pose Prezidente Repúblika, Francisco Guterres ‘Lu-Olo’, Xanana Gusmão la partisipa. Nune’e, iha inaugurasaun estátua Proklamadór Francisco Xavier do Amaral, Taur Matan Ruak mak la hola parte fali. Ne’e duni, durante selebrasaun ne’e lider rezisténsia na’in rua ne’e la hasoru malu.
Tanba ne’e, Xanana Gusmão ne’ebé lori Taur no Lu-Olo ba Palasiu Ai-Tarak Laran, la konsege fó agradesimentu ba Taur Matan Ruak no la kongratula mós Francisco Guterres ‘Lu-Olo’ iha momentu tomada de pose.
Bainhira jornalista sira konfirma auzénsia Xanana Gusmão nian iha serimónia ne’e komisaun organizadora rasik mós laiha informasaun.
“Xanana la mai ne’e, ami la hatene”, dehan Ministru Dionísio Babo Soares, ne’ebé mós nu’udar prezidente komisaun organizadora selebrasaun restaurasaun independénsia ba dala XV no tomada de pose prezidente repúblika foun, iha Tasi Tolu-Dili, Sábadu (20/5).
Iha fatin hanesan, Prezidente Parlamentu Nasionál (PN), Adérito Hugo da Costa hateten, Xanana hola parte iha serimónia ne’e, maibé públiku mak la haree.
“Xanana mai maibé ita mak la haree, tanba serimónia ne’e nia mak organiza,” Adérito.
Entretantu, tuir observasaun diáriu INDEPENDENTE, serimónia pose partisipa kompletamente husi lider antigu sira, úniku Ministru Planeamentu Investimentu Estratéjiku (MPIA), Kay Rala Xanana Gusmão mak la partisipa.
Nune’e, observasaun ba inaugurasaun Estátua Proklamadór Francisco Xavier do Amaral nian lider antigu sira hanesan Prezidente Repúblika sesante, Taur Matan Ruak, no Eis Prezidente Repúblika, José Ramos Horta mós la partisipa.
Entretantu iha serimónia inaugurasaun Estátua ne’e, partisipa Prezidente Repúblika (PR), Francisco Guterres ‘Lu-Olo’, Primeiru Ministru (PM), Rui Maria de Araújo, Prezidente Parlamentu Nasionál (PN), Adérito Hugo da Costa, Ministru Konselleiru no Ministru Kay Rala Xanana Gusmão, Majór Jenerál F-FDTL Lere Anan Timur, Prezidente ZEESM, Mari Alkatiri no Mau-Huno.
