Deklarasaun ne’e hasai husi deputadu sira iha omenajen ikus husi Parlamentu Nasionál ba matebian Mário Carrascalão, iha Uma Fukun PN, horisehik.
Durante asume kargu nu’udar governadór provínsia Timor-Timur, iha tempu Indonézia, Mário konsege funda UNTIM (Universitas Timor-Timur), Politéknika Hera, inklui fó bolsu estudu ba timoroan barak ba estuda iha Indonézia.
Liu husi serimónia omenajen ikus iha Parlamentu Nasionál, Xefe Bankada Partidu Demokrátiku (PD), Adriano Nascimento hateten, Mário Carrascalão halo revolusaun ba iha setór edukasaun.
Haruka estudante timoroan rihun ba rihun kontinua estudu iha universidade boboot foti área oioin iha Indonézia, liu husi planu polítiku saudozu nia hodi fo bolsu estudu ba estudante ne'ebé hetan valór di'ak iha momentu ne’ebá.
Saudozu iha vizaun brillante tebes, iha hanoin ne'ebé hakarak foin-sa'e timoroan sira hetan siénsia atu matenek hodi lori Timor ba oin. Tanba ne’e, suporta nafatin estudante timoroan sira ba eskola maski nia hatene hela estudante sira ne’e kontra rejime Indonézia nia ukun iha Timor.
Liu husi planu polítika ne’e, ohin loron iha era ukun-aan joven sira ne'ebé saudozu forma sai rekursu umanu ne'ebé potensiál tebes hodi kontribui ba dezenvolvimentu nasionál ohin loron nian.
“Tanba ne’e ami husi partidu jerasaun foun nian konsidera Mário Viegas Carrascalão sai hanesan pai rekursu umanu ba novu país demokrátiku Timor-Leste”, dehan Adriano.
Iha fatin hanesan, Deputada Bankada CNRT, Bilou Mali hatete, saudozu Mário sai hanesan eroi ne'ebé kontribui tebes ba luta libertasaun independente. Iha nia moris asume kargu importante sira iha momentu difisil, maibé kontinua servisu hodi luta ba ukun rasik aan.
Entretantu, Xefe Bankada Frente Mudansa, José Luis Guterres hatete, saudozu Mário nia vida moris sempre kontribui forma oioin ba independénsia Timor nian, iha tempu ne'ebé difisil Indonézia sira izola povu Timor iha tinan barak nia laran proibi ema komunidade internasionál sira mai vizita Timor .
Maibé iha mandatu governadór iha Timor-Leste, saudozu konsege konvense prezidente Soeharto hodi loke Timor ba mundu internasionál atu turista sira mai vizita no fó oportunidade ba jornalista internasionál sira mai halo kobertura ba sofrimentu povu Timor hodi divulga sai iha mundu internasionál.
Nune’e Xefe Bankada FRETILIN, Aniceto Guterres hateten, Mário hanesan polítika jerasaun 1974 ne'ebé destakadu husi UDT embora iha momentu ne'ebá nia integra ba iha Portugál, maibé nia iha perkursu polítika iha momentu ne'ebá to’o Timor ukun aan. Saudozu sempre iha mehi ba Timor nia di'ak no hakarak povu ne'ebé independente.
Mário hanesan ema ne'ebé íntegru, konfronta ne'ebé mais demokrátiku ne'ebé sai hanesan inspirasaun nomeadamente ba jerasaun foun sira.
Saudozu sidadaun ne'ebé pertense husi nasaun ne’e nia ne'ebé koñesidu ba nia atividade tomak durante iha nia moris.
UNTL Fó Omenajen Ikus
Universidade Nasionál Timor Lorosa'e (UNTL), liu husi Fakuldade Ciénsia Sosiáis (FCS), hasae omenajen ikus ba saudozu matebian Mário Viegas Carrascalão.
Reitór UNTL, Francisco Miguel Martins liu husi nia diskursu hatete, saudozu Mário nia domin no favór sura la hotu no selu labele, hahú husi loke dalan ba jornalista sira, kaer lalenok leno ba mundu lori Timór ninia terus no susar ba mundu lia matan kro'at.
Iha loron 1 Outubru 1986, loke dalan ba timoroan atu hetan ba asesu ensinu superiór iha rai doben Timór Lorosa'e liu husi loke UNTIM (Universitas Timor-Timur) no Politéknika Hera.
Nu’udar knua no hun ba edukasaun no polítika ukun rasik aan kaer metin lia lulik nian ne’ebé sei halo “Eu sou o caminho e a verdade” ho ida ne’e kaer metin lia loos no justisa hodi hato’o problema UNTIM ninia sai audiénsia eteritas katak siénsia no verdade ba siénsia no lia loos.
