Ne’e duni, programa g7+ ne’e buka atu bele hadi’a povu sira nia moris no atu hadi’a sira nia rai ne’e pás ho estabilidade.

Tanba ne’e, Prezidente Repúblika, Francisco Guterres ‘Lu-Olo’, dezeju susesu barak iha konferénsia ne’e nune’e bele komprometidu hodi hadi’a dezenvolvimentu sustentavel ba tinan 2030.

“Hotu-hotu komprometidu iha liafuan ida ba planu ida hakarak ida para hametin pás no estabilidade, hadi’a mós sira nia rai dezenvolvimentu sustentavel”, dehan nia.

Tanba ne’e, Eis Prezidente Parlamentu Nasionál ne’e dehan nia parte iha kompromisu rasik hakarak atu asegura dezenvolvimentu sustentavel ne’e.

Nia hatutan, fatór no elementu barak intervein iha laran, liuliu pratikamente planu governasaun país kona-ba edukasaun, saúde, administrasaun publika, orsamentu estadu, planu dezenvolvimentu planu no programa governu nian kuaze hotu-hotu tama iha laran para bele asegura sustentavel atu bele Timor-Leste ne’e ba oin.

Ne’e duni, buat hirak ne’e hotu sei hein eleisaun parlamentár nian, Governu ida ke forte, kompetente no kredivel lori planu dezenvolvimentu ne’e ba oin hodi hadi’a rai doben ne’e.