Hafoin simu pose, PR Lu-Olo hateten, nu’udar Prezidente Repúblika sei tuir nafatin Konstituisaun RDTL no sei kaer metin Independénsia Nasionál, unidade Estadu nian no funsionamentu Instituisaun ba Estadu Demokrátiku Timor-Leste nian.

“Nu’udar Prezidente Repúblika ha'u hatete fila fali katak, ita atu fó aan atu fó forsa nafatin ba demokrasia timoroan sira nian ho laran haksolok tebes”, dehan Xefe Estadu foun, hafoin simu pose, iha Tasi Tolu-Dili, Sábadu (20/5).

Tanba ne’e, nia hateten ho vontade durante tinan sanulu resin-lima tenke hamutuk nafatin hodi hala’o knaar Prezidente Repúblika Timor Leste, nu'udar país ida ne'ebé demokrasia ne'ebé mundu rekoñese.

PR Lu-Olo ho laran metin katak, momentu importante ne’e atu lembra saida mak mantein sosiedade sira nia hakarak hodi bele respeitu sira nia direitu, maibé keta haluha mós tane aas nafatin Estadu demokrátiku ne’e.

“Ha'u fó hanoin ida fali ba liafuan ida dehan katak la'ós sura de'it ninia folin mak fó ba ninia bainhira ninia valór aas, maibé tanba nia hatene moris ho liberdade”, dehan nia.

Tanba ne’e, tenke sukat beibeik mak oinsá mak liberdade moris loro-loron, fó liman ba malu, hadomi malu, hametin malu ho povu iha rai doben ida ne’e.

Lu-Olo mós agradese ba povu Timor-Leste tomak fó kontribuisaun ne'ebé to’o ohin loron atu hametin liután no hein katak husu nafatin fó povu Timor-Leste atu fó hanoin nafatin atu la’o hamutuk hodi dezenvolve rai ne’e.

Entretantu, iha selebrasaun ne’e, Lu-Olo hato’o mós mensajen ba povu Timor Leste tomak tenke hametin nafatin pás, liberdade no estabilidade.

Iha serimónia ne’e, Prezidente Repúblika Lu-Olo mós entrega ofisialmente medalla ho grau grande colar ba Prezidente Repúblika sesante, Taur Matan Ruak.