Mário hanesan figura polítika ida ne'ebé koñesidu iha revolusaun funu tinan 24 nia laran hanesan governadór ba provínsia 27 husi Indonézia nian, ne’ebé kontinua servisu mós ho lider rezisténsia sira hodi tau nia interese ba ukun-aan.

Iha ninia mandatu nu’udar governadór, inisia polítika ne'ebé hakarak Timor-Timur sai provínsia hodi loke dalan ba komunidade internasionál, liu-liu média sira mai halo kobertura iha Timor hodi divulga sai informasaun rezisténsia timoroan nian.

Eis governadór ne’e iha interese makaas ba iha dezenvolvimentu rekursu umanu, timoroan lubuk ida konsege hetan bolsu estudu husi Mário Carrascalão ba eskola iha Indonézia.

Ne’e duni, ho nia esforsu tomak timoroan ohin loron matenek barak ne'ebé hetan lisensiadu iha tempu Indonézia.

“Ema barak matenek ne’e balun mai husi nia (Mário) obra”, dehan Prezidente Parlamentu Nasionál, Adérito Hugo da Costa, hafoin pose Prezidente Repúblika, iha Tasi-Tolu, Sábadu (20/5).

Nia hatutan, iha tempu ukun-aan matebian kontinua fó kontribuisaun ba konstrusaun Estadu hodi harii Partidu Sosiál Demokrata (PSD) hodi konsege hetan asentu iha Parlamentu Nasionál.

Nune’e, iha tempu governu Aliansa Maioria Parlamentár (AMP), saudozu promove sai hanesan Vise Primeiru Ministru asuntu Sosiál. Tanba ne’e, lider sira hanesan ne’e nia luta labele sura iha tempu ikus.

Ne’e duni, timoroan barak sente triste no lakon ema ne'ebé iha fuan domin ba nia ema no nia rain iha minutu ne'ebé atu marka istória Timor nian iha loron restaurasaun ne’e.

Asidente Trafegu iha Portu

Asidente tráfegu akontese iha Portu Dili oin, Sesta (19/5), tuku 09:00, rezulta Eis Governadór Mário Viegas Carrascalão hakotu iis.

Sasin Hipólito da Silva hateten, matebian uza karreta Mini Pajero kór mean ho xapa matríkula 21-215.

Nia esplika, akontesimentu fofoun matebian xoke uluk joven ida iha portu oin, maibé tanba matebian hetan sofre korasaun, entaun halo matebian trauma hodi xoke moru portu Dili nian.

Hafoin asidente nia tenta hamate karreta no ko'us sai matebian, maibé haree ba nia kondisaun grave ona.

Nune’e, sira evakua kedas matebian ba Hospital Nasional Guido Valadares (HNGV), maibé la konsege salva nia vida. Matebian ne’e hakotu iis iha Banku Emerjénsia maizumenus tuku 10:00.

Antes ne’e, Eis Vise Primeiru Ministru IV Governu Konstitusionál ne’e mós hala’o operasaun daruak iha ospitál Singapura.

Entretantu, Segundu Komandante PNTL Munisípiu Dili, Superintendente Asistente Euclides Belo hateten, bainhira asidente ne’e mosu rezulta joven ho motór mós hetan kanek maibé la grave.

Komandante ne’e Afirma, Komandu sei loke prosesu ne’e hodi Halo ezaminasaun ba asidente ne’e, hodi kabe ba rezultadu parte médiku nian hodi prosesa kazu ne’e.

Mário Carrascalão Sofre Korasaun

Asidente ne'ebé hakotu Mário Carrascalão hakotu nia vida tanba matebian sofre korasaun.

Diretór Klínika HNGV, Flávio Brandão hateten, matebian lori mai iha HNGV nia kondisaun ne’ebé labele salva ona. Matebian hetan asidente ne’ebé relasiona ona liu-liu halai ba matebian nia fuan.

Matebian mai to’o iha sala emerjénsia tempu ne’ebé badak ne’e hatudu katak matebian nia fuan mak ataka hodi la konsege salva nia vida.

“Nia moras serangan jantung, tanba ne’e ita la halo autópsia ba kazu. Tanba, família koopera katak labele halo autópsia tanba laiha hanoin negativu ruma husi akontesimentu ne’e”, tenik nia.

Kanek ne’ebé parte médiku HNGV identifika maka matebian nia liman parte karuk kanek ki'ik no parte ulun maka raan sai uitoan. Moras seluk maka sofre korasaun hodi provoka matebian.

Iha fatin hanesan, vítima ne’ebé hetan xoke Júnior do Carmo hateten, nia mai husi nia uma Bebonuk diresaun ba Bidau no vítima para hela motór atu ba sosa pulsa telemovel, maibé derrepente karreta ida mai xoke husi kotuk.

Ho akontesimentu ne’e, vítima hetan kanek kmaan iha nia ain karuk no ain loos maibé kondisaun normál.

Biografia Matebian Mário Viegas Carrascalão

Moris iha: Waitalipu-Venilale Munisípiu Baukau 12 Maiu 1937. Saudozu oan dalimak maun alin hamutuk 12 oan husi aman Manuel Viegas Carrascalão, sidadaun portugés no Marcelina Guterres sidadania Timor.

Iha Okupasaun Indonézia Mário Carrascalão hetan fiar husi Governu Indonézia sai Governadór Timor-Timur iha loron 18 Setembru 1983 to’o loron 18 Setembru tinan 1992. Durante kaer knaar nu’udar Governadór lider kurazozu ne’e sempre defende povu nasaun ne’e nia dignidade hodi luta hasoru injustisa ne’ebé forsa militár Indonézia hala'o hasoru povu rai ida ne’e.

Polítika no estratéjia ne’ebé Carrascalão trasa iha momentu iha tempu ne'ebá maka prepara rekursu umanu fó bolsa estudu ba joven timoroan hodi ba eskola iha Indonézia.

Iha tinan 1993, Mário Carrascalão nu’udar Embaixada Indonézia nian iha Romania. Maski hetan kargu ne’e husi Governu Indonézia, maibé Mário nu’udar timoroan la husik timoroan sira terus mesak iha rai doben ne’e.

Iha tinan 1998, ezisténsia CNRT hala'o reuniaun iha penisiu Portugál foti Mário Carrascalão nu’udar Vise Prezidente CNRT.

Hafoin ukun-aan, iha segundu konstitusionál Maria asume kargu hanesan segundu Vise Primeiru Ministru Asuntu Administrasaun no Boa Governasaun ne’ebé simu pose iha loron 5 fulan Marsu 2009.

Iha loron ikus, antes hakotu nia iis, Kinta 18 Maiu 2017, matebian simu kondekorasaun husi Eis Presidente Repúblika, Taur Matan Ruak, tanba kontribuisaun lider nian iha tempu rezisténsia to’o ohin loron.