SEA iha 2020: Zero Dollar ba Zero Plastiku Featured

By Pedro Alves Janeiru 10, 2020 3246
SEA halo limpeza jeral hamoos plastiku iha kapital Dili. Foto INDEPENDENTE SEA halo limpeza jeral hamoos plastiku iha kapital Dili. Foto INDEPENDENTE

DILI: Iha tinan ida ne’e, Sekretariu Estadu Meiu Ambiente (SEA) la preve osan ba politika “Zero Plastiku” ne’ebé SEA rasik inisia tanba konsidera katak responsabilidade ba politika ida ne’e la’os governu mesak.

Sekretariu Estadu Demetrio Amaral hatete, iha proposta OJE 2020, SEA la propoin orsamentu ba planu asaun politika zero plastiku.

“Ha’u lakohi halo pólitika ida governu mak halibur plastiku tanba ne’e governu la tau osan ba, maibe halo pólitika ida atu reforsa empreza sira haree plastiku ne’e hanesan rekursu ba industria,” dehan Sekretariu Estadu Demetrio iha Parlamentu Nasionál, Kuarta (08/01).

SEA la preve osan iha OJE 2020 ba politika refere tanba garantia katak iha tinan 14 Janeiru oin mai kompaña ida sei lansa industria ba produs plastika sai pafin.

“Posibilidade kompãnia seluk tama produs plastiku ba buat seluk,” dehan Demetrio.

Aleinde ne’e, nia dehan, SEA daudaun ne’e prepara ona esbosu lei kona-ba eliminasaun importasaun plastiku no sei aprezenta ba Konsellu Ministru hodi diskuti no aprova.

“Espera (lei kona-ba eliminasaun importasaun plastiku) bele hetan aprovasaun lalais,” nia dehan.

Entretantu, planu prioridade ba SEA iha tinan ida ne’e sei foka liu ba programa 10 husi programa 26 ne’ebé iha, mak hanesan; previlensia ba alterasaun mudansa klimatika, konservasaun biodiversidade, hala’o dezenvolvimentu sira ne’ebé hamenus poluisaun, edukasaun ambiental, haluan lisensa ambiental ne’ebé lais no efektivu liu tan, reforsa pólitika ba jestaun pólitika zero plastiku, no revitaliza fali tara bandu iha fatin sira atu ema labele sunu rai hodi halao atividade kiikoan sira.

Rate this item
(0 votes)

Independente Digital TV