Durante ninia vizita, Majór Jenerál Chevalier hasoru malu ho Prezidente Ramos-Horta, Primeiru Ministru Xanana Gusmão, Ministru Defeza, Xefe Estadu Maiór Jenerál F-FDTL, no Sekretáriu Estadu Protesaun Sivíl.
“Hodi ko’alia kona-ba hametin kooperasaun seguransa bilaterál, hasa’e kapasidade resposta ba dezastre no asisténsia umanitária, no habelar oportunidade dezenvolvimentu edukasionál no profisionál. Konversa hirak-ne’e haree liu ba hadi’a koordenasaun no resposta entre ajénsia seguransa no emerjénsia Timor-Leste nian, avansa programa formasaun no interkámbiu hamutuk, no promove estabilidade no reziliénsia rejionál iha Indo-Pasífiku,” Sita komunikadu ne’ebé Média INDEPENDENTE asesu husi Média Embaixada EUA iha Timor-Leste, Tersa (31/03).
Vizita ne’e, Majór Jenerál Chevalier mós hamutuk ho ofisiál governu sira iha serimónia lansamentu ba instalasaun Timor-Leste nia Rede Komunikasaun Rádiu Emerjénsia Nasionál dahuluk, marku istóriku ida ne’ebé sei hametin komunikasaun no koordenasaun entre Polísia Nasionál Timor-Leste, Ajénsia Protesaun Sivíl, F-FDTL, no servisu ambulánsia nian.
Aleinde ne’e, Majór Jenerál Chevalier halo mós vizita ba Muzeu Rezisténsia no Universidade Nasionál Timor-Leste, koalia ho estudante sira, profisionál sira ne’ebé foin hahú kareira, no ofisiál militár sira hodi destaka importánsia husi edukasaun no dezenvolvimentu profisionál.
“Vizita Majór Jenerál Chevalier nian ne’e reforsa parseria kleur ona entre Estadus Unidus Amérika no Timor-Leste, hodi hatudu kompromisu hamutuk ba seguransa, reziliénsia, no prosperidade iha rejiaun Indo-Pasífiku,” Afirma komunikadu.
Biografia: Majór Jenerál Andrew J. Chevalier
Majór Jenerál Andrew J. Chevalier serbisu nu’udar Adjuntu Jerál no Komandante Jerál Guarda Nasionál Rhode Island nian, responsável ba bem-estar, prontidaun, no operasaun hirak husi soldadu no aviadór nain 3,100 resin.
Nia hetan nomeasaun ofisiál iha tinan 1990 liuhusi Universidade Rhode Island nia programa ROTC ba Ezérsitu no serbisu ona iha nível lideransa hotu-hotu, inklui destakamentu oioin ba Irake no Kuwait.
Nia iha lisensiatura iha administrasaun negósiu husi Universidade Rhode Island no mestradu iha Seguransa Nasionál no Estudus Estratéjiku husi Koléjiu Funu Naval Estadus Unidus nian.
Nia líder ida ne’ebé iha esperiénsia ho dékada barak, Majór Jenerál Chevalier mós hala’o ona papél importante sira iha resposta interajénsia nian ba dezastre, formasaun, no mentorizasaun ba jerasaun tuirmai líder militár no sivíl sira.
