Durante ne’e, eletrisidade mate-lakan sai problema boot ne’ebé governu Aliansa Mudansa ba Progresu (AMP) seidauk konsege rezolve.

Mosu preokupasaun boot husi públiku ba kestaun refere, tanba ahi mate-lakan fó impaktu negativu ba komunidade sira, liu-liu sira ne’ebé uza sasan elektronika hodi hala’o atividade negosiu no sira-nia atividade lorloron nian.

Ministru Obras Públika interinu Nicolão Lino Freitas informa, iha tinan 2020 MOP propoin iha OJE osan ho montante boot ba Sentru Eletrisidade Hera no Betano hodi garantia ahi labele mate-lakan.

“Sim, relasiona ho ahi mate-lakan, iha tinan 2020 governu koloka osan ba manutensaun ba iha eletrisidade ninian ho nia montante boot liu ba jerador Hera no Betanu ho osan  tokon $142 ba iha operasaun no manutensaun ba lina transmisaun,” dehan nia iha Parlamentu Nasionál (PN), Kuarta (08/01).

Aleinde alokasaun orsamentu refere, nia informa, governu mós kontrata ona kompaña lokal sira hodi haree no halo manutensaun ba liña eletrisidade iha area rural sira atu garante distribuisaun enerjia eletrisidade ba komunidade tomak.

“(Ida ne’e atu) responde ba preokupasaun komunidade nian ne’ebé durante sempre mósu ahi avaria bebeik,” dehan nia.