Ministru Defeza no Seguransa no Ministru Interior interinu Filomeno Paixão hatete, iha informasaun balun ne’ebé nia parte simu katak durante ne’e iha membru husi grupu arte-marsiais balun ne’ebé governu bandu ona tama subar ba Indonezia hodi halo juramentu iha Al-qur’an no bandeira Merah Putih nia okos.

“Ha’u rona balun ba jura iha ne’ebá (Indonezia), jura iha Alkoraun (Al-qur’an) nia leten i jura fali iha bandeira Merah Putih nia okos, eipaa.. ida ne’e halo nusa. Ita iha nasaun ida, ita la’ós provínsia, de modu que, ida ne’e kestaun sériu tebtebes i tenke kolia entre governu ho governu,” dehan Filomeno iha Ministériu Finansas, Ai-Tarak Laran, Dili, Segunda (06/01).

Ho nune’e, Ministru ne’e dehan, iha tinan ne’e nia parte sei kolia ho Ministru Negósiu Estranjeiru no Kooperasaun (MNEK) oinsá atu haree kestaun ne’e hodi komunika ho governu Indonezia.

“Ohin Jenerál Xefe (Lere) mós hatete, husi governu tenke sériu ona, komesa governu entre governu par haree ona kestaun ida GAM ne’e, no tinan ne’e ami sei tuur hamutuk ho MNEK par ami haree halo nusa atu rezolve kestaun ida ne’e,” ministru ne’e afirma.

Nia dehan, durante ne’e PNTL halo serbisu ne’ebé di’ak tebes hodi kaptura membru GAM ne’ebé hakat liu fronteira hodi ba halo juramentu no sa’e sabuk iha area jurídiku Indonezia, maibé sempre liberta.

“Polisia kaer beibeik lori ba iha prokuradoria no lori ba iha tribunal. Portantu ne’e kestaun ida la’ós polisia de’it, tenke ho prokuradoria no tribunal, ita hotu hotu tenke hatán rame-rame ka.”

Iha fatin hanesan, Xefe Estadu Maiór Jenerál F-FDTL, Major Jenerál Lere Anan Timur, nia fó ona orden ba ofisial F-FDTL hotu atu kontrola ninia membru sira bainhira dezloka ba rai li’ur.

“Ohin ha’u apela ba ofisial sira hotu, tenke kontrola ninia ema sira, liu-liu kuandu dezloka ba li’ur. Dezloka ba li’ur bele vizita privadu, mais nu’udar instituisaun nia ema ne’e tenke fó hatene ba ninia komandante katak, ha’u loron ida ne’e ba fatin ida ne’e no trata asuntu ida ne’e, par ita bele kontrola, tanba militár ne’e diferente,” dehan nia.

Lere dehan, membru F-FDTL no PNTL sira ne’ebé hola parte iha arte marsiais, di’ak liu fila ba vida sivíl duke estraga instituisaun nia naran.

“Arte marsiais ita bele dehan katak membru FDTL no PNTL mós fasparte, mais tenke iha neutralidade. Mais see mak hakarak arte marsiais di’ak liu fila ba vida sivíl duke hela iha instituisaun par estraga instituisaun nia naran,” deklara Lere.