Deputadu Adriano hato’o kestaun ne’e relasiona ho informasaun husi Ministra Finansas Interina Sara Lobo Brites ne’ebé hatete katak daudaun ne’e ezekusaun OJE 2019 atinze ona porsentu 84.
Tuir deputadu PD ne’e, maske governu AMP deklara ezekusaun ne’e boot maibé laiha impaktu ba povu, tanba governu la tau osan ba povu nia nesesidade.
“Ita la tau osan ba nesesidade povu nian, ezekusaun orsamentu 100% mós povu la sente, tanba ne’e mak ami-nia pozisaun osan ne’e tenke boot ba iha setór produtivu hodi nune’e ezekusaun ne’e 100% povu mós hetan nia benefisiu,” dehan nia.
Deputadu ne’e dehan, iha OJE 2019, governu AMP tau orsamentu boot ba makina estadu nian no la tau prioridade ba povu nia nesesidade.
“Governante ida dehan “ha’u-nia ezekusaun 100%”, povu sei hatete “ami la sente osan ne’e”, tanba la sensivel ba povu nia nesesidade.”
“Ita tenke haree bens serbisu, kapital menór, ne’e ba de’it governante sira-nia nesesidade, maibé koalia kona-ba nesesidade povu nian haree ba kapital dezenvolvimentu.”
“Agora, kapital dezenvolvimentu mak haree povu-nia nesesidade, bee-moos, agrikultura, edukasaun, saúde, ida ne’e mak importante liu. Maibé orsamentu ne’ebé liga ba iha ne’ebá laiha, konserteza povu la sente ninia vantazen,” Adriano esplika.
Entretantu, molok ne’e Ministra Finansas Interina Sara Lobo Brites husi total OJE 2019 ho montante billaun $1.4, ezekuta ona 84%, signifika kuaze 16% mak fila fali ba kofre estadu.
“Porsentu 16 ne’e ita koalia kona-ba ezekusaun ba ita-nia planu, entaun billaun $1.482 ita ezekuta ona pur volta de billaun $1.240 ital. Entaun sei iha pur volta $200 millaun mak la ezekuta, maibé ida ne’e ita koalia kona-ba orsamentu, kuandu to’o fin-du anu mak la ezekuta ne’e hangus ona,” dehan nia.
Nia dehan, ezekusaun OJE 2019 atinze de’it porsentu 84 tanba prosesu ezekusaun hahú iha Marsu 2019.
“Orsamentu promulga iha Feveriru (2019) no hahu ezekusaun iha Marsu, iha primeiru trimestre ne’e ezekusaun ki’ik, durante fulan sia (9) tempu ne’ebé badak maibé kontribui ona, ezekuta ona 84%,” dehan nia.
