Governu Hahú Diskute Instalasaun Esplora Greater Sunrise Featured

By INDEPENDENTE Outubru 12, 2018 2374
Ministru Reforma Lejizlativa Asuntu Parlamentár (MRLAP), Fidelis Magalhães Leite Ministru Reforma Lejizlativa Asuntu Parlamentár (MRLAP), Fidelis Magalhães Leite

DILI: Governu tau ona prioridade atu diskute asuntu dada kadoras Greater Sunrise hodi esplora iha Beacu-Vikeke. Tanba ne’e, iha enkontru Konsellu Ministru diskute ona planu orsamentu ba infraestrutura no instalasaun materiál konstrusaun nian.

Ministru Reforma Lejizlativa Asuntu Parlamentár (MRLAP), Fidelis Magalhães Leite hateten, Timor-Leste sosa ona asaun ConocoPhillips montante tokon $350 ho porsentu 30%, tanba ne’e Governu hahú planu orsamentu instalasaun fatin esplorasaun nian.

“Governu sei informa iha tempu badak, maibé ami sei enkontru Konsellu Ministru mak foti desizaun”, dehan nia, iha Uma Fukun Parlamentu Nasionál, horisehik.

Tuir nia, Governu sei tau prioridade, nune’e OJE 2019 sei halo planu ba orsamentu hodi prevé ba planu ne’ebé durante ne’e mehi atu dada kadoras mai Timor-Leste.

Enkontru konsellu Ministru sei halo rezolusaun kona-ba planu orsamentu atu halo infraestrutura, instalasaun tékniku, no estudu viabiliza iha rai maran no mós tasi okos.

Iha fatin Ketak, Prezidente Bankada Partidu UDT, Gilman Exposto hateten, tenke apoia inkondisionalmente ba asuntu ne’e hodi rezolve asuntu nasionál.

Nia dehan, importante mak estudu viabilidade ba teknikamente oinsá dada kadoras mai Timor-Leste. Ne’e duni Governu presiza koordena ho joint ventura sira halo estudu kle’an nune’e labele mosu impaktu negativu prosesu tomak.

Osan Sosa Asaun ConocoPhillips Prevé iha OJE 2019

Governu Timor-Leste halo ona akordu ho kompañia operadór mina ConocoPhillips hodi sosa nia asaun 30%, maibé Governu la orsamenta iha Orsamentu Jerál Estadu 2018, tanba ne’e sei prevé ba orsamentu 2019 nian.

Tuir Sekretáriu Estadu Komunikasaun Sosiál (SEKomS), Juvinal Mericio ‘Akara’ hatete, planu polítika sosa asaun kompañia operadór mina ConocoPhillips ne’e ba interese nasionál, tanba ne’e sei uza duni osan povu nian hodi sosa.

Estadu Timor iha kometimentu boot atu dada kadoras mai iha Timor, tanba ne’e Governu sei prevé osan hodi submete mai iha Parlamentu Nasionál atu hetan aprovasaun no Prezidente Repúblika promulga atu bele uza ba halo investimentu públiku.

“Ita sosa asaun ConocoPhillips ne’e hanesan pra-kondisaun ida atu ita bele dada kadoras mai iha Timor, tanba ne’e presiza aprova ninia osan”, dehan nia.

Nia esplika, desizaun ne’e hanesan pra-kondisaun ida mai Estadu Timor atu bele tuur hamutuk ho akompaña joint ventura sira atu ko'alia ba malu kestaun negósiu nian.

Tanba ne’e, fiar ba Xanana tanba ema vizionáriu no iha kapasidade atu bele konvense operadór seluk atu bele dada kadoras mai Timor.

Esperiénsia hatudu ona, iha prosesu negosiasaun Fronteira Marítima ema barak duvida maibé realidade tinan ida ho balu de’it hamutuk ho Xanana bele atinji duni mehi ne’e.

Rate this item
(0 votes)

Independente Digital TV