Kona ba asuntu ne’e, Partidu CNRT entrega ona ba Primeiru Ministru Taur Matan Ruak mak responsabiliza.

Xefe Bankada Partidu CNRT Duarte Nunes hateten, governu da Ualu ne’ebé  lidera husi Primeiru Ministru Taur Matan Ruak, konstitusionalmente eziste ona durante fulan tolu resin.

Maibé, problema kandidatura membru governu nain sia, hitu husi partidu CNRT no rua husi partidu KHUNTO  seidauk hetan pose husi Xefe estadu.

Maski situasaun la’o hanesan ne’e, maibé governu ne’e sei kontinua la’o ba oin, sei la la’o ba kotuk ka para de’it  iha fatin, tanba iha ona programa no orsamentu rasik atu halo dezenvolvimentu.

“governu ida ne’e atu la’o ho karosa ka la’o ho karreta roda tolu mós kontinua la’o tanba governu iha ona programa no osan”, dehan Duarte iha PN horisehik.

Nia hatutan, Ministru sira ne’ebé seidauk iha sei difikulta prosesu ezekusaun Orsamentu Jeral Estadu (OJE) maibé, ne’e depende  ba Xefe Governu atu bele monta ninia estratéjia.

Osan no programa iha hotu ona, maibé bainhira la ezekuta ho diak, ne’e PM mak iha kompeténsia, tanba ne’e laiha diskusaun  katak, membru governu la kompletu.

Bainhira sente afeta ba governu, Primeiru Ministru tenke esforsu aan hodi buka dalan ba asuntu refere.

Antes ne’e, Prezidente Parlamentu Nasionál Arão Nóe hateten, problema kona-ba kandidatura membru governu nain sia ne’ebé to’o oras ne’e seidauk simu pose, ne’e kompetensia Prezidente Repúblika no Primeiru Ministru  atu ko'alia ba malu hodi buka solusaun.

Maibé, haree ba impaktu negativu funsionamentu mákina estadu ne’e boot tebes, tanba Orsamentu Jeral Estadu 2018 aprova ona no membru governu seidauk kompletu, ne’e sei afeta ba ezekusaun orsamentu estadu.

Tanba ne’e, Arao Noé husu ba PR no PM atu  tuur hamutuk nafatin hodi foti ona desizaun, oinsá bele kompleta  estrutura governu, atu nune’e bele halo ona servisu hodi servi povu  no nasaun.