Dezde mosu diferensa ideia kona-ba prosesu formasaun governu iha fulan-Juñu 2018, Xanana dala barak liu sees malu ho Xefe Estadu hodi halo servisu iha li'ur no delega kompeténsia tomak ba Taur Matan Ruak.
Maski nune’e, hafoin remata negoseia ho kompañia joint ventura ba esplorasaun Greater Sunrise hodi sosa asaun 30% husi ConocoPhillips, lider na’in rua ne’e konsege ko'alia hikas ba malu.
Soru-mutu Xanana no Lú Olo, iha Palasiu Prezidensiál, Bairru-Pité, horisehik, la’o ho ho tátika ‘klandestina’ ne’ebé la tama iha ajenda Xefe Estadu nian.
Nune’e, Prezidente Repúblika mós rekoñese katak soru-malu ne’e dalan ida atu hakotu impase polítika. Tanba ne’e husu ba hotu-hotu tenke fó hanoin ba malu, labele ema ida de’it.
“Maski nia (Xanana Gusmão) halo kritika, maibé nu'udar Xefe Estadu, ha'u la ko'alia kona-ba ne'e. Iha kestaun ne'ebé boot liu maka nasaun no povu nia moris”, dehan PR Lú Olo, iha otel Novo Turismo, horisehik.
Nune’e, iha enkontru sira na’in rua la sita kona-ba impase polítika iha rai laran, maibe foka liu ba desizaun polítika Estadu nian kona-ba sosa asaun ConocoPhillips.
Tuir informasaun husi Prezidente Repúblika bainhira partisipa Kongresu Datolu Camara Comercio Indústria Timor-Leste (CCI-TL) katak, hasoru malu ho Xanana ko’alia kona sosa asaun ConocoPhillips nian prosesu liga ba Fronteira Marítima (FM) maibé ko'alia lalais de’it.
“Ha’u husu ba Xanana Gusmão hanesan Negosiadór Prinsipál atu fila-fali mai tenke aprezenta relatóriu ida mais kompletu, posivel kona-ba prosesu sira ne’e hotu atu ita bele diskute no bele hatene kle'an liután,” tenik nia.
Nune’e, Xefe Negosiadór Prinsipál deklara ba Xefe Estadu katak prontu atu fó informasaun detalladu hafoin fila husi viajen ba estranjeiru.
Entretantu iha soru-mutu ne’e foka ba asuntu Fronteira Marítima nian, ne’e duni la ko’alia kona-ba kandidatu membru governu na’in sia (9) ne’ebé sei pendente hela.
Nune’e, iha soru-mutu entre Primeiru Ministru (PM), Taur Matan Ruak ho Prezidente Repúblika mós kona-ba asuntu sosa asaun ConocoPhillips.
PM Taur hateten, Prezidente Repúblika hakarak hetan tan informasaun barak ne’e sira sei halo esforsu hosi halibur dokumentu hotu ne’ebé relasaun ho ida ne’e, atu Xefe Estadu bele inteira di’ak liután iha tempu oin mai.
