Antes ne’e, Xefe Negosiadór Prinsipál Fronteira Marítima, Kay Rala Xanana Gusmão, apela ba polítiku na'in sira ne’ebé fahe malu iha partidu polítiku sira atu hahú tuur hamutuk hodi tau aas interese nasionál atu bele dada kadoras mai Timor.
Vise-Prezidente Bankada Partidu FRETILIN, Francisco Miranda Branco hatete, FRETILIN hanesan partidu istóriku ne’ebé sempre afavor ba interese nasionál. Tanba ne’e, hakarak mós atu dada kadoras ne’e mai Timor atu bele benefísiu povu no nasaun.
“FRETILIN apoiu governu 100% atu dada kadoras mai iha Timor, maibé ami iha direitu atu hatene kustu rendimentu ne’ebé governu ne’e sei hetan iha futuru”, dehan nia, iha Uma Fukun Parlamentu Nasionál, horisehik.
Laiha partidu ida mak atu kontra kadoras mai iha Timor, maibé Governu tenke aprezenta rezultadu estudu viabilidade. Kadoras dada mai Timor sei gasta osan hira no ba futuru ne’e sei hetan kustu rendimentu hira. Nune’e Parlamentu bele hatene hodi fó apoiu totál ba asuntu ne’e.
Iha fatin hanesan, Deputadu Bankada PD, Mariano ‘Assanami’ Sabino hatete, Partidu Demokrátiku nia-prinsípiu ne’e defende atu dada kadoras mai Timor, tanba ne’e hanesan polítika interese nasionál.
Fronteira Marítima, petrolíferu, no riku-soin sira seluk ne’e konsidera hanesan polítika soberania no polítika ekonomia ne’ebé prinsipál tebes atu bele benefísiu povu no nasaun.
“Iha situasaun saida de’it militante no simpatijante PD 100% apoiu Governu atu dada kadoras mai Timor” tenik nia.
KM Aprova Rezolusaun ba Akizisaun GS
Entretantu, iha parte seluk, Konsellu Ministru aprova rezolusaun kona-ba aprovosaun kontratu ba akizisaun interese partisipativu no diretu iha kampu Greater Sunrise nian.
“Ba 2019 presiza tau duni orsamentu tanba ita-nia Estadu liu husi Governu nia-asaun hodi sosa duni asaun”, dehan Ministru Estadu Prezidensial no Konsellu Ministru (PKM) Hermenegildo ‘Agio’ Pereira.
Nia hateten, asaun ne’ebé Timor-Leste sosa husi ConocoPhillips montante tokon $350 ho porsentu 30%, ne’e duni Governu iha devér prevé duni orsamentu OJE 2019 ba akordu ne’ebé Estadu Timor-Leste ho kompaña joint ventura sira halo iha akordu ona.
Nune’e, planu VIII Governu sei prevé OJE 2019 atu sirkula akordu sira ne’ebé Timor-Leste ho ConocoPhillips sira halo iha Bali-Indonezia.
Partisipasaun Timor-Leste iha operasaun petrolífera no transferénsia interese partisipativu hirak ne’e rasik diretu sira afavór ba Timor GAP, ne’ebé ninia subsidiária hodi bele hetan atu jere riku-soin hanesan reprezenta Estadu Timor-Leste.
Nune’e, parseiru atuál ba joint ventura Sunrise mak hanesan Woodside hanesan operadora ho partisipasaun 33,4%, ConocoPhillips 30%, Shell 26.6%, no Osaka Gás 10%.
Tranzasaun kona-ba fa’an kobre partisipasaun husi ConocoPhillips iha kontratu partilla produsaun 03-19 no 03-20iha arendamentu sira retensaun nian NT/RL2 no NT/RL4. Tranzasaun ne’e sei remata trimestre dahuluk 2019.
