Ne’e duni, Xefe Negosiadór Prinsipál ba Delimitasaun Fronteira Marítima, kay Rala Xanana Gusmão, husu ba partidu polítiku (parpol) hotu-hotu atu mantein unidade hodi tane aas nafatin interese nasionál, nune’e bele realiza duni mehi povu nian atu dada kadoras mina mai Timor-Leste.
Iha oportunidade ne’e, husu partidu polítika sira tenke prinsípiu boot hodi tane aas interese nasionál, nune’e interese partidu nian tau ba sorin bainhira nasaun hamutuk lori nasaun.
“Ita presiza konfiansa ba malu, bainhira ita la komprende malu susar atu dezenvolve ita nia-rai,” dehan Xanana, iha Sede AMP, Bairru-dus-Grilos, horisehik.
Ne’e duni, situasaun polítika oioin mak akontese iha Timor-Leste, maibé hamriik metin hodi apoia malu, nune’e lori Mina mai. Tanba politikamente Timor-Leste hetan independénsia no ekonomikamente mós tenke independente.
Nune’e, Xanana husu ba joven sira presiza estuda no analiza oinsá mak hadi'a futuru nasaun, tanba ne’e foin-sa’e sira tenke iha planu hadi'a dezenvolvimentu.
Agradese Povu Timor-Leste
Iha fatin hanesan Xefe Negosiadór Prinsipál ba Delimitasaun Fronteira Marítima, Xanana Gusmão, agradese ba povu Timor-Leste durante ne’e apoia makaas ikus mai manan funu hodi ukun rasik aan, liña fronteira marítima define.
Iha observasaun ne’e, Xanana Gusmão tun husi aviaun iha Aeroportu Internasionál Nicolau Lobato Komoro, membru Governu sira simu Xanana Gusmão nune’e kontinua viajen ba Sede AMP.
Iha karavana ne’e rasik kuaze foin-sa’e, ferik ho katuas sira hala’o hahú iha Aeroportu Komoro to’o Sede AMP, Bairru-dus-Grillos, ne’ebé hetan apoia husi membru seguransa PNTL ne’ebé apoia vijilánsia bainhira mosu engarrafamentu.
FRETILIN Ezije Aprezenta Relatóriu
Entretantu, relasiona ho prosesu sosa asaun husi kompañia joint ventura ba esplorasaun Greater Sunrise, ConocoPhillips, Bankada Partidu FRETILIN kestiona makaas despeza, tanba ne’e ezije ba ba governu tenke aprezenta relatóriu.
Vise-Prezidente Bankada Partidu FRETILIN, Francisco Miranda Branco hatete, atividade ba asuntu negosiasaun Fronteira Marítima nia kontinuasaun mak iha foin lalais ne’e Xefe Negosiadór konsege negoseia ho kompañia operadór mina ConocoPhillips hodi sosa tan nia asaun 30% ne’e.
Prosesu ne’e hanesan orgullu ba timoroan tomak, tanba ne’e FRETILIN hakarak dezeju no fó kongratulasaun ba ekipa negosiadór sira hotu.
Prosesu negosiasaun ne’e governu aloka osan barak ba ninia despeza, tanba ne’e públiku presiza hatene relatóriu ba despeza hotu-hotu ne’ebé hala’o ona iha atividade ne’e.
“Ha’u hakarak husu ba governu atu aprezenta relatóriu despeza ba atividade negosiasaun Fronteira Marítima nian ba públiku”, dehan nia, iha Uma Fukun PN, horisehik.
Hataan ba kestaun, Ministru Reforma Lejizlativa no Asuntu Parlamentár (MRLAP), Fidelis Magalhães hatete, kestaun ba Fronteira Marítima no sosa asaun ConocoPhillips ne’e ba interese Estadu. Ne’e duni, ba relatóriu despeza atividade ne’e sei hato’o ba governu liu-liu ba ministériu relevante atu haree.
