Sábadu, 07 Dezembru 2019 | Login
Eis Prezidente Parlamentu Nasional atual Presidente Komisaun B iha PN, Aderito Hugo da Costa. FOTO: Doc Eis Prezidente Parlamentu Nasional atual Presidente Komisaun B iha PN, Aderito Hugo da Costa. FOTO: Doc

TDD Notifika Adérito Hugo ba Kazu Deskonfia Dada Ahi Ilegál Featured

DILI:Karta notifikasaun Tribunál Distritál Dili (TDD) ba deputadu sira iha Parlamentu Nasionál la'ós novidade foun.

 

Tribunál Distritál Dili notifika tan ona Presidente Komisaun B, Aderito Hugo da Costa nu'udar arguidu ba kazu deskonfia dada ahi ilegál iha tinan 2016.

Tuir Presidente Komisaun A (asuntu konstitusionál no justisa), Carmelita Caetano Moniz hatete, Presidente Parlamentu Nasionál simu karta notifikasaun husi juis prosesu Tribunál Distritál Dili baixa ona ba komisaun A.

Ami bolu ona eis Presidente (PN) atuál deputadu husi bankada Partidu CNRT Aderito Hugo hodi rona ona nia. Ami hein de’it halo aprovasaun lori mai iha plenária,”dehan Carmelita ba diáriu INDEPENDENTE, segunda horisehik iha parlamentu nasionál.

Deputada ne’e konfesa, komisaun A rekomenda atu hasai imunidade maibé ne’e depende ba deputadu sira.

Ami rekomenda atu hasai imunidade maibé ne’e ami debate lai kazu ida ne’e iha plenária”.

Tuir nia katak, kazu dehan eis Presidente PN dada ahi ilegál ne’e husi prokuradór sira mak ko’alia iha konteúdu notifikasaun.

Carmelita dehan, tuir nia pontu de vista hanesan ema sidadaun bai-bain katak kuandu ema ruma dada ahi ilegál ba multa de’it, esperiénsia balun hatudu antes ne’e deputadu balun mós deskonfia dada ahi ilegál maibé ba multa de’it kazu ne’e hotu ona.

Maibé (tanba saida) ba eis Presidente Parlamentu Nasionál Aderito Hugo nian mak tenke ba rejista iha Ministériu Públiku.

Maibé ami haree katak durante ne’e atuál deputadu ne’e sosa pulsa fulan-fulan,”tenik nia.

Tuir informasaun ne’ebé diáriu ne’e rekolla katak, deputadu Aderito selu ona multa ba estadu kona-ba dada ahi ilegál ne’e.

Iha fatin hanesan, eis Presidente Parlamentu Nasionál atuál deputadu (CNRT) Aderito Hugo hatete, prosesu agora ne’e la’o hela no desizaun finál sei mai.

Ha’u koopera ho sira (EDTL) dezde halo inspesaun, hanesan sidadaun prontu atu kolabora, ita atu halai ba ne’ebé tanba lei no regra ne’e ba ema hotu-hotu,”dehan nia iha (PN) horisehik.

Antes ne’e, Tribunál Distritál Dili mós notifika ona deputadu Fransisco Kalbuadi Lay husi bankada partidu CNRT, atu sai testemuña ba kazu brankamentu kapitais, maibé tuir informasaun katak Kalbuady sei hala’o tratamentu saúde iha Singapura.

Aleinde ne’e, parlamentu mós hasai ona imunidade deputadu na’in rua husi bankada Partidu Demokrátiku, Mariano Assanami Sabino ba kazu karau susu been no deputadu Antonio da Conceição (Kalohan) ba kazu fa'an fós iha Vemasse, Baukau.

Deputadu na’in rua, Assanami ho Kalohan mak husu rasik ba parlamentu hasai sira nia imunidade hodi kolabora ho prosesu justisa.

Foin lalais, parlamentu fó ona autorizasaun ba deputadu Assanami hodi bele sai testemuña ba kazu refere.

Entretantu ba kazu eis Presidente Parlamentu Nasionál, Vicente Gusterres hein hela karta notifikasaun foun husi Tribunál Distritál Dili, tanba nia la'ós ona nuudar deputadu.

Eis Presidente PN ne’e hamutuk ho Sekretáriu Jerál PN, Ministériu Públiku akuza ho krime abuzu podér ho partisipasaun ekonómika, relasiona ho projetu sosa karreta Prado ba deputadu terseira lejizlatura.

Relasiona ho kazu ne’e, iha tinan 2014, Primeiru Ministru, Xanana Gusmão (atuál Reprezentante Espesiál ba Asuntu Petróleu) halo karta ba parlamentu hodi husu deputadu sira labele hasai Vicente Guterres nia imunidade, inklui membru governu sira ne’ebé deskonfia komete krime korrupsaun durante mandatu kintu Governu Konstitusionál.

Read 3008 times
Rate this item
(0 votes)
MidAd1