Prokudarór Jerál Repúblika (PJR) José da Costa Ximenes informa, iha 17 Setembru 2020, TDD kondena ona prizaun tinan 10 ba arguidu ida ho naran Jeri ne’ebé transporta Timor-oan na’in rua ba Indonezia.
“Informa ba ita-boor sira mak kona-ba arguidu ida ho naran Jeri ne’ebé transporta Timor-oan na’in rua ba Indonézia, iha loron 17 Setembru Tribunál Distritál Dili koondena ho pena prizaun tinan 10 ho pena asesoria,” dehan PJR José ba jornalista sira hafoin enkontru semanal ho Prezidente Repúblika Francisco Guterres Lú Olo iha Palasiu Prezidensiál Bairu-Pite, Tersa (22/09).
Nia esplika, hafoin kumpre prizaun durante tinan 8 nia laran mak sidadaun Filipina ne’e sei hetan espulsaun ba nia rai.
“Apartir esplusaun nia sei la tama fila fali Timor,” dehan nia.
Entretantu, iha 29 Maiu 2019 autoridade seguransa Indonezia nian kaptura feen no laen husi Timor-Leste ho insial JSP no AS tanba identifika lori droga ho tipu extasi iha kaixa makina imprime.
Alfandega Indonezia iha Mota-ain konsege identifika droga ne’ebé kazal Timor-oan subar iha makina imprime laran, liu husi inspesaun X-ray.
Husi identifikasaun Unidade Polisia Droga Belu ho Alfandega Atambua, droga ho tipu extensi ne’e hamutuk grama 1.861.
Droga ne’ebé kazal ne’e lori hamutuk falun lima. Falun dahuluk iha pílula (pil) kór matak hamutuk 972, falun daruak iha pílula kór azul 988, falun datoluk iha pílula kór azul 969, falun dahaat iha pílula kór matak 977, no ikus liu pílula kór kastaña (coklat) 968.
Total pilupa ne’ebé kazal ne’e lori hamutuk grama 1.861, kompostu husi pilula kór matak ho grama 724, kór azul ho grama 791, no kór kastaña ho grama 346.
