Arguidu viola ona artigu 316 pontu 1 Kódigu Penál kona-ba kontra bandu ne'ebé deskreve katak, "Ema ne’ebé la halo liu hosi alfándega ka hosi kontrole seluk tan obrigatóriu ba merkadoria ne’ebé tama ka sai hosi Timór-Leste nia territóriu bem ka merkadoria ne’ebé nia importa ka esporta sei hetan pena prizaun tinan 2 too tinan 6 ka multa.

Tuir kronolojia ne’ebé Ministériu Públiku lee sai akuzasaun katak, iha loron 17 fulan-Jullu tinan 2014, tuku 10:00 dadeer, iha Batugadé, arguidu ba sosa ikan iha fronteira, maibé to’o iha ne'ebá arguidu la sosa ikan sosa fali kilat-manu hodi lori mai iha Timor.

Iha altura ne'ebá arguidu hetan Indonéziu ida fa’an kilat manu ho folin US$ 50, nune'e arguida sosa kilat ne'e rua ho totál osan US$ 100.

Nune’e mós arguidu deklara ba Tribunál katak, faktu ne’e loos hotu tanba iha momentu ne’ebá arguidu ba duni fronteira atu sosa ikan, maibé laiha intensaun atu sosa kilat.

“Tanba hetan bapa ida fa'an kilat manu ida $50, tanba ne’e mak ha'u sosa rua hamutuk $100,” tenik Mário.

Nia dehan nia sosa duni kilat to’o mai iha ne’e fa’an fali ba kolega ida naran João.

Julgamentu ne’e Tribunál adia fali ba loron 21 fulan-Fevereiru, tuku 11:00 atu rona deklarasaun husi João.

Audiénsia julgamentu ne'e prezide husi juis koletivu Zulmira Auxiliadora, Sribuana da Costa, Antonino Gonçalves. Nune'e, Ministériu Públiku reprezenta husi Prokuradór, José Elo no arguidu hetan asisténsia legál husi Defensór Públiku, Agostinha de Oliveira.