Deputadu César Valente 'Pilotu' hateten, situasaun iha territóriu Timor laran tomak la’o konduzivu, maibé iha kapitál Dili sempre akontese joven sira ne'ebé hamahan aan iha arte marsiál hodi halo konfrontasaun iha bairru balun halo komunidade sira la hakmatek.

Tuir nia, atu halo kualkér pasa revista iha fatin ne'ebé de'it, só PNTL no FFDTL mak iha kompeténsia, maibé loron joven sira mak halo fali pasa-revista ba malu.

“Ha'u rona iha fatin balun arte marsiál sira balun halo pasa-revista ba malu, pior liután mak ha'u rona membru PNTL uza balun sivíl hamutuk ho grupu arte marsiál ne’e,” dehan César, iha plenária, Segunda (23/1).

Nia husu ba PNTL atu forma ekipa ida ho karakter ne'ebé rigór hodi halo investigasaun atu ema sira ne’e bele kaptura lalais para ba hataan iha tribunál.

Iha fatin hanesan, Presidente Bankada CNRT, Natalino dos Santos reforsa, membru arte marsiál sira ne'ebé halo pasa revista balu ne’e kria situasaun grave. Tanba ne’e, husu ba komandu jerál PNTL atu kombate situasaun ne’e.

To’o ohin loron laiha mudansa signfikante, tanba ne’e PNTL tenke firme no konsistente hodi kaer metin nafatin orden komandu nian hodi bele salva guarda ezisténsia Estadu Timor-Leste.

Nia hatutan, ohin loron Timor-Leste atu halo festa demokrasia, tanba ne’e presiza situasaun ne'ebé estavel atu povu sira bele livre hodi halo nia atividade loro-loron.

Nune'e, Deputadu Eládio Faculto hateten, ohin loron fenómenu ne'ebé akontese oin seluk loos, estudante sira ladún preokupa hodi estuda, maibé sira mete liu ba problema arte marsiál hodi ataka malu hodi abandona sira nia devér.

Nia afirma, inan-aman tenke hamutuk ho governu tenke fó hanoin nafatin ba nia oan sira atu labele envolve aan iha grupu ne'ebé laiha vizaun no misaun ne'ebé la klaru.

Entretantu, Deputada Virgínia Ana Belo hateten, ohin loron kazu arte marsiál ne'ebé balun uza rama ambon PNTL konsege kaptura, maibé ikus mai tenke husik fali tanba lei la garantia.

Tanba ne’e, husu ba Prezidente Parlamentu Nasionál atu bele ajenda ona atu bele halo diskusaun lalais kona-ba lei regulariza kona-ba uza sasán kro'at iha fatin públiku.