Asistente Inspetor Vicente Gusmão hatete, iha tinan 2016 nia laran Serbisu Migrasaun liu husi Sektor Operasional prosesa sidadaun estranjeiru na’in 949 ne’ebé viola vistu.

“Sidadaun estranjeiru sira ne’e ita prosesa hamutuk 949. Iha ema 813 mak rejolvidu no selu multa ona,” dehan Vicente ba Jornalista iha nia serbisu Fatin MI Vila Verde Dili, Tersa (24/1)

Vicente haktuir, sidadaun hirak ne’ebé maka maiória viola vistu ne’ebé maka aas liu maka Indoneszia 112, Xina 4, Kambodia 11, no Vietnam 6.

Nia dehan, ema hirak ne’e barak mak uza vistu turista hodi halo vida negosiu, laós uza vistu traballu.

Reforsa Serbisu

Entretantu, Serbisu Migrasaun halo rekrutamentu ba membru hamutuk na’in 30 husi Kontenente Jerál Polisia Nasional Timor-Leste (PNTL) hodi reforsa serbisu iha Serbisu Migrasaun.

Asistente Inspetor Vicente hatete, Serbisu Migrasaun halo rekrutamentu ba membro Serbisu Migrasaun liu husi Kontenente Jerál.

“Iha tinan 2016, ami halo rekrutamentu ba ema 30 hodi nune’e haforsa serbisu ba Serbisu Mgrasaun nian,” dehan Vicente.

Vicente haktuir, rekrutamentu ne’e hala’o husi seksaun Investigasaun, Membru Forsa Rezerva no Unidade seluk.

Tuir Nia, SM planeia atu monta Postu iha Munisipiu 12 nune’e halo Serbisu Operasaun ba sidadaun estranjeiru ne’ebé mak dadaun ne’e sirkula hela iha teretoriu Timor laran tomak.

“Ita hatene katak ema husi rai liur sirkula iha ita-nia rai barak tebes, tanba ne’e mak ami halo rekrutamentu ne’e,” katak nia.