Vítima Gaspar hetan sona iha parte kabun ho tudik modo baihira atu sosa modo iha Merkadu Taibesse.
Segundu Komandante PNTL Munisípiu Dili, Superintendente Asistente Euclides Belo hateten, komandu eskuadra Na’in Feto halo ona identifikasaun ba suspeitu menoridade ne’e, maibé entrega hikas ba ninia família hodi hein kompeténsia Ministériu Públiku nian.
“Ita la detein suspeitu tanba ninia idade menór, tan ne’e ita entrega ba ninia família atu asegura hela, kuandu prosesu ne’e la'o Ministériu Públiku sei halo aprosimasaun”, dehan nia, iha komandu Polisia Kaikoli, horisehik.
Komandante ne’e haktuir iha prosesu identifikasaun, suspeitu JP deklara hetan obriga husi mane ida uza kaos arte marsiál. Maibé nia la hatene ema ne’e. Haruka nia ba sona kolega mane ida ne’ebé la'o mai daudaun iha suspeitu nia oin.
“Ha’u hela iha Bekora ha’u la'o halimar mai merkadu ha’u tuur hela iha terminál, derrepente mane ida mai besik ha’u fó tudik ida dehan o sona took alin mane ida mai ne’e”, haktuir komandante ne’e.
Simu tiha tudik ne’e suspeitu mós halo tuir kedas autór ninia planu. Bainhira sona hotu autór halai lakon husik hela suspeitu JP mesak. Entaun nia haree Gaspar ninia raan sai, nia ta'uk to’o nakdedar. Ema barak mak halai mai tanba vítima monu ba rai hakilar makas loos. Komunidade sira asegura suspeitu depois mak telefone ba polisia.
Suspeitu JP orijen husi Munisípiu Baukau oras ne’e entrega hikas ona ba família, nune’e vítima Gaspar rasik sei baixa hela iha Ospitál Nasionál Guido Valadares hodi kontinua hetan tratamentu intensivu.
Janeiru Kazu Krime 41
Komandu Polisia Nasionál Servisu Investigasaun Kriminál (PNSIK) Munisípiu Dili durante fulan-Janeiru nia laran rejista kazu krime hamutuk 41. Husi totál númeru ne’e, kazu ne’ebé aas liu mak ofensa integridade fíziku simples ho númeru kazu hamutuk 15
Segundu Komandante PNTL Munisípiu Dili, Superintendente Asistente Euclides Belo hateten, kazu ne’e rasik sempre hetan atuasaun lalais husi Polisia bainhira hetan informasaun ruma husi komunidade, nune’e mós kuandu polisia rasik hatene ka haree direita asegura kedas.
Tuir nia, kazu ofensa integridade fíziku makaas liu mak akontese iha loron (2/2) liu ba iha Ai-mutin. Tanba ne’e, Polisia aperta nafatin movimentu grupu arte marsiál sira nian atu labele iha tan konfrontu ba malu.
Euclides dehan, mós kazu ameasa ho totál númeru 12 mak Polisia rejista, no mós kazu violénsia doméstika 10 no kazu burla iha tolu.
Kompara ho fulan-Dezembru 2018, kazu ofensa integridade fíziku simples hetan volume boot ho totál kazu hamutuk 19.
Ne’e duni, ekipa operasaun konjuntu PNTL hala’o servisu ne’ebé iha semana rua ne’e iha mudansa ba situasaun iha kapitál Dili. Volume konfrontu ki’ik inklui kazu krime mós menus.
