SB ne’ebé hatene nia feen sei koalia barak bainhira nia halo sala ruma, deside hodi foti katana no ameasa nia feen.

SB dehan iha 13 Setembru 2018 tuku 17.00 mosu diskusaun entre nia ho nia feen ho inisial FL tanba arguidu la tula sira-nia oan atu ba tuir kursu ingles.

“Ha’u rona nia (lezada) dehan fali ‘o nia apa ba enkontru to’o fali kalan, la hatene ema fó osan hira’, tanba ne’e ha’u nervozu hodi basa nia maibé dala ida de’it. Ha’u foti duni katana maibé la tau iha nia kakorok, ha’u kaer de’it iha ha’u-nia liman mak hodi hatete ‘o nonok ka lae’. Ha’u kaer katana ne’e ho intensaun atu halo nia nonok,” deklara SB ne’ebé sai arguidu iha sala julgamentu TMD, semana kotuk.

Entretantu, tuir akuzasaun husi Ministériu Públiku (MP), feen ho laen ne’ebé moris hamutuk dezde tinan 2001 no iha ona oan na’in neen ne’e monu ba diskusaun ne’ebé nakonu ho tensaun.

Kauza husi diskusaun manas ne’e tanba arguidu ba tuir enkontru Konsellu organizasaun relijiaun ida husi dader no foin remata iha lorokraik, tan ne’e arguidu mós la konsege tula nia oan ida hodi ba tuir kursu.

Bainhira to’o uma, arguidu ne’ebé sente kolen latan kedan isin hodi toba. Lezada husu nia oan sira atu ba kuru bee, maibé teki-teki arguidu hader no hatete ba lezada katak ‘o hakarak saida? Ha’u baku o mos rai la naben’, hafoin koalia nune’e arguidu basa lezada nia hasan dala rua no kaer lezada nia kanuruk hodi dudu ne’ebé halo lezada nia matan-fukun fai ba odamatan no lezada monu ba rai.

Arguidu kontinua dada lezada hamrik no uza katana tau iha lezada nia kakorok hodi ameasa atu oho lezada.

‘Konsekuensia husi arguidu nia hahalok kauza lezada sente moras, bubu metan iha parte hasan no matan fukun,” dehan MP.

Ho hahalok ne’e, MP akuza arguidu ba pratika krime violensia domestika ho forma ofensas integridade fizika simples no krime ameasa.

Rona deklarasaun husi arguidu no akuzasaun husi MP, tribunal deside atu adia julgamentu ba loron seluk hodi rona fali deklarasaun husi lezada.