Tuir deklarasaun husi ZS, nia hahalok ne’ebé nia hatudu ba SJ ne’e nu’udar reasaun ne’ebé mosu tanba SJ mak provoka uluk.

Deklarasaun husi ZS ne’ebé sai arguida iha Tribunal Munisipal Dili (TMD) ne’e kontrariu ho deklarasaun husi Ministériu Públiku (MP).

Iha ninia akuzasaun, MP dehan, iha 5 Janeiru 2018 hafoin arguida nia abo fila husi SJ nia uma, arguida ba lezada nia uma hodi bolu no hatete atu rezolve problema.

Bainhira lezada mai iha arguida nia uma, lezada hahú nervozu no kaer arguida nia faru gola. Ho asaun ne’e, arguida ho lezada hahú baku-malu, ikus mai arguida ba foti katana hodi sona lezada nia isin.

Ho asaun ne’e, MP akuza arguida ba krime ofensa integridade fizika simples no krime armas branka.

Ba faktus ne’e, arguida deklara katak balun loos no balun sala.

Tuir nia, iha altura ne’ebá hafoin arguida nia abo fila, lezada mak la’o ba-mai hodi tolok arguida. Nune’e, arguida nervozu no koalia maka’as.

Lezada ne’ebé rona arguida nia lia-fuan hakat mai arguida nia uma no tolok arguida bainhira arguida lao sai. Lezada mós mak tuku uluk arguida.

Arguida dehan, lezada rakut nia oin, lori kanuru boot baku nia kanuruk.

“Tanba ne’e ha’u nervozu hodi halai ba foti katana. Ha’u foti katana ne’e laos ho intensaun atu oho lezada maibé atu hatauk de’it lezada tanba nia mós baku ha’u,” dehan arguida iha sala julgamentu, semana kotuk.

Hafoin rona deklarasaun ne’e, tribunal deside adia julgamentu ba loron seluk ho ajenda rona deklarasaun husi lezada.