Fundus ne’e entrega hosi Embaixadór Japaun ba Timor-Leste, Eiji Yamamoto ba Governu Timor-Leste liu hosi asina MoU ho Vice Ministra Saúde, Ana Isabel Soares, no Vice Ministru Obras Públiku Transporte no Telekomunikasaun I, Januáriu Pereira asiste hosi prezidente autoridade munisípiu sira,iha Embaixada Japaun, Kuarta (22/03).
Projetu fundu asisténsia ba projetu iha área rurál 6 Governu Japaun deside ona hodi fornese osan montante US$ 487,055 ba organizasaun 6 ho objetivu atu atende nesesidade báziku umanu nian no suporta povu nia moris loron-loron liu-liu iha área rurál.
Projetu sira ne’e hanesan, renovasaun edifisiu eskola iha Suku Batara Munisípiu Manatutu ho orsamentu US$ 83,237.
Projetu ba konstrusaun Postu Saúde, Suku Uabobo Munisípiu Vikeke ho montante US$ 83,299.
Funda projetu ba renovasaun edifísiu Eskola Uaitame iha Postu Administrativu Quelikai, Munisípiu Baukau montante osan US$82,332. Projetu konstrusaun Sistema bee mós iha Suku Potete, Munisípiu Ermera osan montante US$82,732.
Konstrusaun ba Sistema Abastesimentu bee moos iha Munisípiu Aileu ho montante US$ 72,455. No projetu Ekspansaun sala emerjénsia no renovasaun área HNGV Dili montante osan US$ 83,000.
Embaixadór Japaun, Eiji Yamamoto husu ba governu atu implementa implementasaun orsamentu hodi halo projetu ho kualidade hodi fó benefísiu ba dezenvolvimentu iha munisípiu sira.
Nia dehan, Japaun fó apoiu fundus ba governu Timor-Leste hodi halais prosesu dezenvolvimentu Timor-Leste.
“Ha’u atu fó hanoin ba ita boot sira katak, ita hotu servisu iha diresaun ida de’it atu suporta ba komunidade sira no ajuda atu hadi'a sira nia vida moris loron-loron liu-liu komunidade sira ne'ebé iha área rurais,”dehan Embaixadór Japaun Eiji Yamamoto iha diskursu.
Nia dehan, Japaun sei kontinua fornese nafatin apoiu dezenvolvimentu hotu ne’ebé povu no estadu TL presiza.
Iha fatin hanesan, Vice Ministra Saúde, Ana Isabel Soares lori naran governu Timor-Leste hato’o agradese ba apoiu Governu Japaun.
Nia dehan, ho apoiu Japaun alende ajuda servisu saúde nian, Japaun apoiu mós área edukasaun, bee moos no projetu dezenvolvimentu seluk tan.
