Taur husu tanba komunidade sira preokupa tebes bainhira hala'o diálogu komunitáriu iha suku Bidau Lesidere no Bidau Akadiru-hun foin lalais ne'e.
Taur rekoñese duni kestaun ne'e akontese iha sidade katak, seguransa sira oho komunidade sira nia animál iha luhan laran no mos iha estrada tanba lei ne'e iha duni no sei buka atu implementa daudaun.
“Grupu Seguransa Jestaun Merkadu sira ba oho fahi sira iha luhan, foin daudauk ha’u rasik husu ita nia governu, Primeiru Ministru Rui Maria Araujo, ha’u husu Primeira Dama ba hasoru ita nia Prezidente Autoridade Munisipál Díli Gaspár Soares, para halo sosializasaun antes haruka Seguransa sira ba halo operasaun,” dehan Taur.
Nia husu atu animál ida ne’ebé iha estrada bele oho, animál ne’ebé iha luhan labele oho.
Prezidente mos husu ba Primeiru Ministru atu tolera oitoan hodi koalia lai ho inan aman sira liu husi tur hamutuk no buka mekanizmu di'ak ida ne'ebé bele rezolve kestaun nee.
Entretantu José dos Santos hato'o nia preokupasaun katak, animal sira ne’ebé sira hakiak ne'e hanesan alternativu ida ba sira hodi bele selu sira nia oan sira nia eskola. No ida nee hanesan alternativu ida úniku ba sira la iha tan dalan seluk.
