Prezidente Komisaun F trata asuntu Saúde Edukasaun deputadu Virgílio Hornay  iha  nia observasaun haktuir katak,  lixu iha kapitál Dili soe no husik namkari deit iha estrada ibun.

Nia haktuir kona ba babain  deputadu sira, membru governu bainhira halo vizita iha nasaun liur hanesan Xina populasaun barak iha mundu no konsumu diária bot maibé iha estrada lixu la iha. Ema la halo fatin lixu hodi tau fali iha estrada,  ne’e signifika sira nia jestaun di’ak.

“Ita tenke  iha oráriu para rekolla lixu  uza mós autoridade lokál aviza ba komunidade atu karreta sira ne’ebé maka ita kontratu bele hare tuir deit”, dehan Virgilio ba jornalista sira PN, Segunda (6/03).

Nia dehan,  hare iha livru orsamental  katak iha tokon $7.7 ba 2017 atu aloka deit ba iha konsturusaun escolar, merenda eskolar no mos limpeza urbanu maibe sidade Dili  nuka livre husi lixu pior liu tan agora sira halo tan fali fatin ida ba hatur tan iha Estrada ibun.

Nia husu ba Ministériu Estatál no administrasaun munisipál tenke hare kestaun sira hanesan ne’e tanba osan iha para atu rekolla lixu maibe susar atu halo jestaun.

Nia rekomenda ba governu atu iha tinan oin tenke hola ona karreta raut foer  rasik tanba kada truk ne’ebé  governu aluga ne’e selu $ 60 ba soe deit lixu iha Tibar. Tuir nia, ida ne’e despeja makaas liu kompara ho governu hola rasik nia karreta.

Iha fatin ketak estudante UNTL Domingos Soares da Silva hatete, lixu sira ne’ebé lekar arbiru iha Estrada publiku, ne’e tanba jestaun husi ministeriu kompetente mak la di’ak.

Liu tan ida nee too agora sidadaun sira mos seidauk iha konsiensia atu soe foer iha nia fatin.

Nia rekomenda ba PN atu kria lei ruma ne’ebé  rigorozu atu ema ne’ebé soe lixu arbiru tenke selu multa. Ho lei ida nee mos bele eduka ema atu aprende soe foer iha nia fatin.