Preokupasaun nee mosu nafatin tanba deputadu sira mós kontinua simu keixa husi pasiente loron ba loron.
Deputadu sira lamenta kona ba orsamentu ne’ebé Parlamentu Nasionál aprova hodi hola material ka fasilidade ba nesesidade HNGV la hatene ba iha nebe.
Xefe Bankada PD Adriano do Nascimento haktuir katak, foin daudaun nia ba halo tratamentu iha klinika Moris Foun Kolmera, nia hasoru komunidade na’in rua iha nebá buka hela tabun raan. Komunidade nain rua ne’e reklama ba deputadu katak iha HNGV fasilidade ida ne’e la iha.
“Hau preokupa tebes, uluk Ministra Saúde hatete katak orsamentu preve hotu ona hodi atende ema moras sira”, dehan Adriano ba Jornalista sira iha PN horisehik.
Adriano esplika liu tan, iha altura ne’ebá Ministra mos dehan katak, kona ba fasilidade prepara hotu ona.
Liu tan ida ne’e, iha momentu ne’ebá PD mós husu atu aumenta tan osan ba iha MS ninian maibé hotu-hotu dehan labele tanba orsamentu kompletu ona.
Nia kontinua lamenta tanba ema moras todan ona hein deit, maibé sira haruka pasiente nia familia ba buka fali iha liur tanba sasan ida ne’e la iha.
Adriano husu atu situasaun ne’e labele akontese beibeik tanba nee sai ameasa bot ba pasiente sira nia vida. Sorte siak sei iha klinika balun iha Dili laran nee faan, maibé kuandu klínika ida mos la fa'an ne’e impaktu boot ba pasiente sira.
Iha fatin hanesan Prezidente Komisaun F trata asuntu Saude Edukasaun deputadu Virgílio Hornay mos kestiona makaas kona ba transferénsia pasiente ba rai liur ne’e hanesan failansu politika boot ida ne’ebé MS no HNGV halo.
Nia konsidera politika MS no HNGV falla tanba tinan tinan aprova orsamentu por volta tokon 8 hodi halo tranferensia pasiente ba rai liur maibé nunka foo melhoramento kondisaun iha hospital sira. Liu liu halo kontratu ba doutór espesialista sira karik mai halo servisu iha ne’e tenki hola mós fasilidade hodi apoiu servisu saude.
“Kada tinan ita preve orsamentu atu halo transferensia pasiente ba rai liur. Ida ne’e problema situasaun ne’ebé ita nunka ultrapasa liu liu ita fo razaun katak ita nia doutór espesialista la iha, ita nia ekipamentu mós sei fraku”, tenik nia.
Entretantu deputada Anastácia da Costa Amaral mós haktuir katak nia simu bebeik keixa husi munisípiu sira dehan ai moruk paracetamol no amoxilin la iha.
Nia dehan, tinan ne’e tau ona osan tokon $ 4.9 preve ba iha SAMES, maibé tanba saida mak too agora problema ai moruk nee kontinua falla.
“Hau husu ba MS tenki hare didiak kestaun sira hanesan ne’e tanba dala ruma pasiente konsulta hotu depois halo tiha reseitas atu ba simu aimoruk maibé la iha”, Anastácia husu.
