Molok ne’e husi parte Igreja informa katak sei halo marsa ba dame iha loron 2 Marsu 2017, loron ida molok kampaña ba eleisaun Prezidensial.
Observadór Politika husi Universidade Nasionál Timor Lorosa’e, Camilo Ximenes hatete, Uma-kreda bele halo asaun, maibé importante mak tenke iha responsabilidade.
“Hanoin (halo marsa ba dame) ne’ebé di’ak, maibé sira mós bainhira halo asaun sira ne’e tenke iha responsabilidade,” dehan Camilo iha nia knar-fatin, UNTL Kaikoli-Dili, Kinta (23/02).
Nia afirma, Konstituisaun RDTL fó garantia atu sidadaun hothotu espresa sira-nia hanoin no sentimentu.
Kandidatu husu Misa
Aleinde ne’e, Observadór ne’e fó mós hanoin ba kandidatu Prezidente Repúblika balun ne’ebé hala’o vizita ba ulun-boot Uma-kreda iha Timor-Leste.
“Kandidatura ida-idak hasoru ita-nia Amu Bispu ho ita-nia Padre sira, maibé ba sira ne’ebé ba hasoru ne’e karik husu par atu halo misa, reza barak liu, husu tulun,” dehan nia.
Nia sujere mós ba kandidatu sira atu labele vizita de’it lideransa Igreja Katolika, maibé vizita mós lideransa husi relijiaun sira seluk ne’ebé eziste iha TL nune’e bele iha ekilibriu.
