Motór hirak ne’e entrega direita husi Ministru Defeza Cirilo Cristóvão hodi apoiu servisu tanba PM nia kna’ar maka  halo seguransa liu liu iha kapitál  Dili.

“Apoiu  motorizada ba PM hodi halo patrullamentu, fó apoiu seguransa ba Polisia Nasional Timor Leste (PNTL) durante eleisaun,” dehan Cirílo ba Jornalista iha Kuartél Jerál F-FDTL Fatuhada, Segunda (6/3).

Orsamentu  né’ebé uza  hodi sosa motorizada 10 ho marka KLX ne’e ho montante 65 mill dolar iha Indonézia.

Governante ne’e dehan,  PM iha kompeténsia hodi uza motor sira ne’e hodi halo seguransa iha eleisaun Prezidensiál no Parlamentár.

Nia husu komandate sira tenki toma responsabilidade ba viatura sira ne’ebé   governu oferese ba militár sira hodi haforsa sira nia servisu  patrullamentu.

Iha sorin seluk Xefe Estadu Maiór Jenerál F-FDTL, Majór Jenerál Lere Anan Timur dehan, governu hatene katak forsa iha duni misaun maka governu oferese sasan ka materiál hodi fasilita misaun nee.

Tanba nee Lere husu ba responsavel sira atu uza motorizada hirak ne’e ho didiak no kuidadu, uza hanesan ita nia rasik hodi halao misaun nee ho diak.