Aderito dehan, mandatu ba kualker orgaun soberania iha sikulu kada tinan 5 tan ne’e laiha dalan atu orgaun soberania ida dehan katak mandatu atu besik remata ona tanba ne’e Xefia sira bele abandona kargu ka halo desijaun politika ruma ne’ebé la tuir ona lei.

Nia hatutan, hanesan orgaun soberania ida tenke mantein hodi halo nia funsaun to’o menitu ikus ne’ebé determinadu.

“Ita kuandu ezerse hela kargu ida ne’e, mandatu konstituisaun mak fó mai ita, kuandu ezerse hela orgaun konstitusionais, parte ida hanesan sidadaun ita tenke halo separasaun kuandu ezerse hela funsaun, se lae ita kria interpretasaun hodi hamosu konfuzaun iha públiku,” katak Aderito iha PN, Segunda (13/03).

Tuir nia, ema ne’ebé assume kargu iha orgaun soberania ne’ebé nia mandatu besik remata ona labele abandona nia serbisu hodi halo servisu seluk.

Iha fatin hanesan, Deputadu Bankada CNRT, Arão Noe hatete, lider orgaun soberania balun ne’ebé nia mandatu besik remata ona komesa hili ona dalan atu asegura nia direitu politiku iha tempu eleisaun maibé tenke tuir nafatin koridor konstituisaun nian.

Nia hatutan, hanesan sidadaun ida ne’ebe lidera hela orgaun soberania ida iha direitu atu espresa nia hanoin ruma liu husi partidu politiku ruma maibé tenke garantia nafatin funsionamentu servisu ne’ebé nia halo.