Deputadu Adiano João husu ba governu atu sosa motor foun hodi fahe ba Xefe Suku sira iha Timor laran tomak atu nune’e bele fasilita sira-nia serbisu.

Adriano deklara kestaun ne’e relasiona ho informasaun ne’ebé nia simu katak autoridade lokal sira hanesan Xefe Suku ne’ebé foin lalais eleitu balun uza transporte públiku hodi hala’o serbisu estadu nian iha baze.

“Ha’u hanoin governu tenke kria kondisaun ba Xefe Suku sira atu bele halo serbisu ho di’ak hodi fasilita povu sira iha suku, tanba ne’e governu tenke fó ona motorizada ruma par sira bele halo serbisu,” dehan Deputadu Adriano iha sesaun plenaria iha Parlamentu Nasionál, Segunda (27.03).

Ba Xefe Suku ne’ebé reeleitu, nia dehan, balun nia motor tuan no balun sei iha kondisaun atu bele utiliza maibé sira ne’ebé foin eleitu no laiha transporte tenke uza transporte públiku bainhira iha reuniaun iha postu administrativu ka munisipiu.

Tuir deputadu ne’e, Xefe Suku nia serbisu todan tebes tanba sira halo interaksaun direita ho komunidade sira iha baze, tan ne’e kuandu governu la tau prioridade hodi fasilita sira atu servisu, sei difikulta dezenvolvimentu iha baze.

Nia dehan, Xefi Suku sira ne’ebé iha Kapital Munisipiu ka Postu Administrativu sei di’ak uitoan maibé sira ne’ebé hela iha area remotas hetan difikuldade boot.

“Kuandu enkontru ne’ebé ho karater urjente, se sira hetan transporte públiku entaun sira ba partisipa maibé kuandu laiha, sira sei labele ba,” katak nia.

Aleinde ne’e, Adriano preokupa mós ho administrasaun iha suku balun ne’ebé sei utuliza mesin ketik hodi hala’o serbisu.

“Governu tenke identifika preokupaaun sira ne’e atu bele responde hodi fó espasu ba Xefe Suku sira atu bele hala’o administrasaun suku nian ho di’ak,” katak nia.

Kona-ba motor, deputadu ne’e dehan, Xefe Suku balun sujere atu governu sosa motor ne’ebé nia suku cadang fa’an barak iha Timor-Leste nune’e bainhira aat, sira bele hadia.