Populasaun sira ne’ebé sei krize bee moos maka hanesan Dili, Baukau, Aileu, Ainaru, Ermera no Vikeke.
Diretór Asosiasaun HAK, Manuel Monteiro Fernandes dehan, povu barak too agora barak seidauk hetan bee moos, tanba fatin ne’ebé sira hela dook husi bee matan. Dala ruma ba kuru bee tenke la’o ain ho distánsia dook.
“Uma kain 10.105 durante ne’e seidauk asesu ba bee moos ne’ebé fornese husi parte Servisu Água no Saneamentu (SAS) no ajénsia internasionál no nasionál sira ne’ebé durante ne’e fó apoiu dada bee moos ba komunidade sira”, dehan nia, iha Faról-Dili, Sesta (24/3).
Relatóriu ne’e fó sai relasiona ho komemorasaun loron internasionál bee moos ho tema “Direitu Ba Bee Moos maibé Tenke Tau Matan Ba Bee Fo'er”, ne’ebé Timor-Leste selebra, iha loron 22 Marsu 2017.
Munisípiu no nia suku sira ne’ebé sei enfrenta krize bee moos mak hanesan, Ainaru ho totál uma kain 864, Aileu uma kain 656, Ermera uma kain 1.064, Vikeke uma kain 3,479, Baukau uma kain 3.479
Iha Dili, fóku ba suku sira ne’ebé iha sidade laran hanesan Suku Kaikoli, Aldeia Sentru da Unidade iha uma kain 210, Aldeia de 12 Divinu iha uma kain 144, Aldeia Foho Rai Boot iha uma kain 190, Aldeia Sakoko iha uma kain 110 no Aldeia Tahu Laran iha uma kain 101.
Suku Bekora, Aldeia Clak Fuik iha uma kain 234, Aldeia Kakau Laran iha uma kain 267, Aldeia Becusi Sentru iha uma kain 408, Suku Kuluhun, Aldeia Soru Mutu ba Dame iha uma kain 102, Aldeia Toko Baru iha uma ka’in 229.
Suku Camea, Aldeia Ai-lele Hun iha uma kain 108, Aldeia Lenuk Hun iha uma kain 71. Suku Bidau Santana, Aldeia Sagrada Família iha uma kain 302. Suku Motaél, Aldeia Bee Dalan iha uma kain 130.
Suku Mascarinhas, Aldeia 03 iha uma kain 178, Aldeia Altu Balidi iha uma kain 199, Suku Komoro, Aldeia 4 de Setembru iha uma kain 430.
Husi rezultadu ne’e, Monteiro dehan, HAK no PNBESI mós sente triste Dili nu’udar kapitál nasaun maibé too agora povu lubuk ida iha sidade Dili nia-ninin sei kontinua enfrenta krize bee moos no balun tenke sosa bee moos.
“Dili nu’udar sidade kapitál nasaun nian mós kontinua hasoru problema hanesan. Faktu ida ne’e hatudu liu husi rezultadu monitorizasaun”, tenik nia.
Relasiona ho problema bee moos nian, Asosiasaun HAK no PNBESI rekomenda ba governu atu aloka Orsamentu Jerál Estadu (OJE) ba programa dada bee moos hodi asegura implementasaun PEDN ba tinan 2030.
Husu ba Ministériu Obras Públiku no Transporte Komunikasaun (MOPTK), Diresaun Água no Saneamentu halo atu kontrolu másimu ba kanu distribuisaun sira ne'ebé instala ona.
Husu ba lider komunitáriu hotu, atu kria enkontru komunitáriu hodi kuida no proteje ba patrimóniu Estadu nian ne’ebé instala iha aldeia, suku, postu no munisípiu ida-idak.
Apela mós ba autoridade seguransa sira hotu, atu implementa lei hodi proteje sidadaun sira labele estraga patrimóniu Estadu ne’ebé instala ona iha munisípiu ida-idak.
