Tuir populasaun, Maliubu katak, Timoroan barak, Atambua-Kupang hakarak, fila maibé estadu TL seidauk fó resposta klaru atu lori sira fila.
Populasaun sira ne’e balun hili sai refujiadu, tanba vítima hosi konflitu moruk pasadu Timor –Leste no Indonézia
“Ha’u hakarak husu Prezidente Repúblika, Taur Matan Ruak, kona-ba Refujiadu Timoroan sira ne’ebé oras ne’e iha Timor osidentál, governu nia konsiderasaun ba sira hanesan Timoroan nafatin,”dehan Reprezentante Komunidade, Luciano de Jesus iha diálogu ho PR iha salaun Igreja Nosa Señora das Dores Hauba, Tersa (07/02).
Nia husu konsiderasaun estadu ba Timoroan sira ne’ebé inosente agora hela iha Indonézia, sei iha direitu kalae sai sidadaun Timor, tanba sira moris iha Timor.
Hataan, ba preokupasaun ne’e, PR Taur dehan, estadu sei labele organiza sira fila, maibé maiske sira hela iha Indonézia, sira Timoroan nafatin no too tempu ida sira hakarak fila,Timor simu nafatin sira.
“Ita nia maluk Timor oan sira ne’ebé refujiadu iha Indonézia hakarak fila laiha buat ida, maibé ha’u hatete estadu no governu la organiza sira atu lori fila tanba Timor oan sira ne’ebé hela iha Timor barak mak sei moris iha terus no susar,” dehan PR Taur.
Nia dehan, razaun estadu seidauk lori refujiadu sira ne’e, fila tanba estadu hakarak rezolve uluk povu Timor nia problema sai husi kiak no mutik.
Taur dehan, lei Timor -Leste la bandu Timoroan sira ne’e hakara sai sidadaun Indonézia, Austrália no Portugál, maibé lei Indonézia nian banku sidadaun dupla.
“Ita nia lei, Ita Timor oan bele sai sidadaun husi nasaun rua tolu hanesan sai Timor Leste, Austrália, Portugál, maibé Indonézia ninia lei hili sidadaun ida de'it labele sai sidadaun rua tanba ne'e refujiadu Timor oan sira iha Indonézia Sidadaun Indonézia maibé ita konsidera sira timor oan nafatin,” dehan Taur.
Durante diálogu povu preokupa kona-ba problema eletrisidade, bee moos, edukasaun, no saúde.
Tuir Observasaun INDEPENDENTE, diálogu PR Taur hetan partisipasaun másimu hosi povu.
Durante diálogu situasaun klimátika iha suku Maleubu sei nafatin udan no anin boot, maibé la impede diálogu hodi la'o too remata.
Iha diálogu ne’e PR Taur konvida mós Administradór Postu Administrativu Laulara, Xefe Suku Matahoi Postu Administrativu Uatulari, Vikeke, Xefe Suku Abafala Postu Administrativu Kelikai, Baukau, Xefe Suku Kampung Alor Postu Administritavu Vera Kruz, Dili,Prezidente Autoridade Munisípiu sira hodi partisipa no halo estudu komparativu ba situasaun moris povu sira nian.
