Komitementu Korea  hato’o hosi, Vise Ministru Negósiu Estranjeiru Repúblika Korea do Súl, Lim Sung Nam ho nia akompañamentu delegasaun durante hala’o vizita kortezia mai TL.

Iha sorumutu ho ho Primeiru-Ministru Rui Maria de Araújo, lider na’in rua ne’e ko’alia kona-ba oinsá lasu amizade liu hosi kooperasaun bilaterál entre Timor-Leste no Korea do Súl bele hametin liu tan iha futuru.

Tópiku importante kona-ba diversifikasaun ekonómika atu nune’e Timor-Leste limita dependénsia ba reseitas hosi esplorasaun mina rai nian mós aborda entre lideres rua no importánsia ba futura rentabilidade nasionál nian.

Kona-ba asuntu diversifikasaun ekonómika, Vise Ministru Lim, ko’alia kona -ba ezemplu no esperiénsia Repúblika Korea nian iha pasadu no oinsá maski enfrenta dezafiu ida ne’e konsege duni supera iha dekadas balun de’it no bele sai rai dezenvolvidu oin loron.

Vise Ministru fiar katak, Timor-Leste mós bele hasoru dezafiu ida ne’e no hadi'a ekonomia ba futuru.

Vise Ministru Lim reafirma mós suporta hosi nasaun Korea atu Timor-Leste bele tama ba Komunidade ASEAN nian.

Iha fatin hanesan, Primeiru-Ministru Rui Maria de Araújo  espresa ba Vise Ministru Lim apresiasaun profunda ba relasaun amizade entre Timor-Leste no Korea do Súl iha tinan sanulu-resin-liu nia laran ne’ebé hamosu oportunidade ba traballadór Timoroan rihun atu ba servisu iha industria rai ne’ebá nian.

PM Rui, aproveita okaziaun ida ne’e mós informa kona-ba politikas ne’ebé VI Governu Konstitusionál hala’o daudauk ne’e kontinuasaun ba polítika dezenvolvimentu estabelese durante V Governu nia tempu nian.

Molok reuniaun remata Primeiru-Ministru mós husu ba Vise Ministru atu Governu Repúblika Korea liu hosi nia Ajénsia Dezenvolvimentu Repúblika Korea nian, KOIKA bele mós suporta tan Timor-Leste nia sistema Information Communications Technology (ICT) nian ne’ebé foin lalais aprova liu hosi Konsellu Ministru.