×

Atenção

JUser: :_load: Não foi possível carregar usuário com ID: 430

JUser: :_load: Não foi possível carregar usuário com ID: 419

Membru UPF Hatama Mina Ilegál Featured

By Fevereiru 28, 2017 4959
Komandu PNTL, Longuinhos Monteiro (atual Ministru Interior) halo pasa revista ba membru UPF Komandu PNTL, Longuinhos Monteiro (atual Ministru Interior) halo pasa revista ba membru UPF

DILI: Membru Polisia Nasionál Timor-Leste (PNTL)-Unidade Polisia Fronteira (UPF) na’in rua hetan kaptura husi autoridade Indonézia nian tanba hatama kombustivel ilegál.

Membru UPF na’in rua ho timoroan ida ‘asegura’ husi ekipa intelijénsia Korem 161/Wira Sakti Kupang, (Nusa Tenggara Timur-NTT), iha Sesta (24/2). Sira na’in tolu kapturadu ho evidénsia hanesan gazolina litru 105 ho speaker rua no lampu motór. Sira mós laiha dokumentu ka pasaporte bainhira tama iha área Indonézia nian.

Membru UPF ne’e identifikadu ho naran AG (25), LMB (22) no komunidade ne’e nia naran MB (35).

Kazu ne’e rasik oras ne’e daudaun iha ona prosesu investigasaun nia laran.

Entretantu, Prezidente Komisaun B Parlamentu Nasionál, David Dias Ximenes ‘Mandati’ hateten, PNTL maka ezekuta lei ho orden maibé sira hala’o fali atividade ne’e signifika komandu la unidade no falta kontrolu.

Ne’e duni, presiza investigasaun ba membru sira ne’e no komandante unidade ne’e, tanba saida maka membru sira hatama sasán ilegál no laiha dokumentu.

“Tenke Investiga komandante sira ne’e, atu nune’e komandante sira brani ka lae fiskaliza sira nia membru sira ne'ebé tama-sai iha fronteira”, dehan nia, iha Uma Fukun PN, horisehik.

Nia dehan, Kazu sira hanesan ne’e erru boot ba komandante, tanba ne’e Ministru Interiór tenke hatún medida ba komandante sira hodi haree ba kazu sira hanesan ne’e.

“Tenke Investiga kle'an ba Komandante Unidade ho nia membru sira ne’e”, hateten David.

Nia Dehan, Keta husik liu de'it kazu sira hanesan ne’e, bainhira ministru ho komandu PNTL inklui komandante unidade sira maka abandona kazu ne’e nasaun sei la lalo ba oin.

Tanba Ne’e, Mandati Konsidera komandante unidade menus kapasidade hodi kontrola membru sira rezultadu hatama sasán ilegál no ema kaer toman.

Iha fatin ketak, Komandu Operasaun Superintendente Henrique da Costa dehan, kazu ne'ebé membru PNTL liu husi membru UPF na’in rua komete ne’e sei iha prosesu investigasaun nia laran.

Tanba ne’e, komandante ne’e afirma presiza halo justifika loloos ba kazu ne’e, informasaun ne'ebé inisiál katak membru na’in rua ne’e sosa pesa motór nian.

“Ita nia prosesu investigasaun la’o hela, tanba ita mós fó ona orientasaun ba komandu unidade atu foti medida hodi foti kazu ne’e ba oin”, tenik nia.

Nia dehan, membru na’in rua ne’e liu husi unidade fronteira ne'ebé hamutuk ho komunidade ida hodi hatama sasán iha fronteira. 

Rate this item
(0 votes)

Independente Digital TV