Sentru votasaun ne'ebé sei estabelese iha territóriu nasionál hamutuk 696 no sentru votasaun iha Austrália rua hanesan Sydney ho Darwin no sentru votasaun iha Portugál (Lizboa) ida ho totál estasaun votasaun 944.
Mapa eleitorál Timor-Leste hamutuk eleitór rejistu totál 743.150. Iha Austrália (Sydney ho Darwin) na’in 889 no eleitór iha Portugál na’in 510.
Diretór Jerál STAE, Acilino Manuel Branco hatete, STAE, CNE hamutuk ho PNTL distribui materiál buletin votu ba sentru votasaun hotu ne’ebé estabelese iha suku hotu iha territóriu Timor-Leste no mós sentru votasaun iha diaspora Darwin, Sydney no Lizboa.
Ekipa STAE ho apoiu husi PNTL transporta pakote materiál sensitivu sira husi kapitál Dili to’o munisípiu, suku no sentru votasaun 944 ne’ebé estabelese iha territóriu Timor-Leste no diaspora.
Ba estranjeiru, nia dehan, STAE ho ekipa Ministériu Negósiu Estranjeiru no Kooperasaun (MNEK) ho supervizaun husi Comissão Nacional Eleições (CNE) sei halo transportasaun via aereo.
Ba Portugál, transporta ona ho aviaun komersiál iha tersa, (14/03), ho rute Denpasar, París, Londres no Lizboa. Nune’e, ba Austrália sei haruka ba iha kuarta, (15/3), ohin.
Antes ne’e, STAE distribui uluk ona materiál non sensitivu sira ba munisípiu sira hotu, tanba ne’e ho distribuisaun materiál sensitivu ne’e mak hodi kompleta ona preparativus STAE nian ba períodu eleisaun prezidensiál 2017.
Eleisaun prezidensiál sei hala’o iha Segunda, 20 Marsu 2017, iha sentru votasaun hotu iha territóriu Timor-Leste no sentru votasaun iha diaspora Darwin, Sydney no Lizboa. Sentru votasaun hotu sei loke iha hahú tuku 07:00 dadeer to’o tuku 15:00 lokraik.
