“Prezidente Repúblika Francisco Guterres Lú Olo, ohin, kongratula Joko Widodo  ne’ebé re-eleitu nu’udar Prezidente Repúblika Indonézia nian ba periodu 2019-2024 liu husi xamada telefónika,” informa gabinete Prezidensial liu husi komunikadu imprensa.

Iha ninia konversasaun ho Jokowi, Lu Olo fó parabéns no fó votus susesu ba Jokowi ho ninia vise ba mandatu tuir mai.

“Ha’u hakarak fó parabéns ba releisaun Prezidente Repúblika Indonézia. Povu indonézia hili nia xefe estadu ida. Povu Indonézia hili ninian bem estar no dezenvolvimentu liu husi ita-nia figura. Ha’u hato’o votus susesu ba mandatu ba oin. Ha’u reafirma fila fali Timor-Leste nia kompromisu  atu hametin di’ak liu tán relasaun rai rua no povu ba futuru,” dehan Lu Olo ba Jokowi.

Entretantu, Prezidente Jokowi agradese ba kongratulasaun husi Xefe Estadu Timor Leste. Jokowi hatete katak durante mandatu ba oin sei haforsa liu tan kooperasaun Indonézia no Timor Leste.

Iha oportunidade ne’e, PR Lu Olo mós konvida Jokowi atu partisipa iha komemorasaun tinan 20 referendu iha Timor Leste.

“Prezidente Jokowi agradese konvite husi Prezidente Repúblika Francisco Guterres Lú Olo ba loron istóriku ne’e,” dehan gabinete prezidensial.

Aleinde ne’e, PR Lu Olo ho ninia espoza Cidalia Lopes Nobre Mouzinho Guterres, hato’o felisitasaun ba  Prezidente Jokowi no espoza Iriana no povu Indonézia ne’ebé sei selebra Idul Fitri.

Hanesan públiku hatene, bazeia ba rezultadu ne’ebé Komisaun Eleisaun Jeral (Komisi Pemilihan Umum-KPU) Indonezia nian fó sai kandidatu Prezidente Repúblika no Vise Prezidente númeru sorteiu 01, Joko Widodo-Ma’ruf Amin konsege hetan vitoria ho votus 55%, hodi halakon kandidatu númeru sorteiu 02, Prabowo Subianto-Sandiago Salahuddin Uno ne’ebé hetan de’it 45%.