Igreja tolu ne’ebé sai tarjetu esplozaun bomba iha Kochchikade, Negombo dan Batticaloa.

Ótel ne’ebé terorista ataka ho bomba mak Shangri-La, Kingsbury, Cinnamon Grand no ótel ba dahaat ne’e lokaliza hotu iha Kolombo.

Igreja Saun Sebastian iha Negombo kondisaun grave tanba hetan esplozaun bomba.

Fotografia balun ne’ebé espalla iha média sosiál hatudu katak, igreja laran liuliu banku sira nakonu ho raan no plafone igreja rahun totál.

Kuaze sarani na’in 67 mate iha igreja laran no ema lubun hetan kanek kamaan no grave iha igreja St Anthony iha Kochchikade, postu administrativu ida iha kapitál Kolombo-Sri Lanka. Entre ema hirak ne’ebé mate iha Kolombo, iha mós sidadaun estranjeiru na’in sia.

Fonte ida husi Ospitál iha Kapitál Batticaloa hateten, kauze ema na’in 27 mate iha igreja kapitál ida iha rejiaun Sri Lanka parte Leste.

Ofisiál ida husi Sri Lanka nia hateten, esplusaun bomba iha Cinnamon Grand, ne’ebé  lokaliza besik residensia Primeiru Ministru Sri Lanka nian, rezulta restaurante ida grave no hamate ema na’in ida.

Ministru Asuntu Interinu, Mano Ganeshan, hafoin vizita área esplozaun ida iha kapitál Kolombo, sente hakfodak.

Prezidente Sri Lanka, Maithripala Sirisena fó sai ona deklarasaun husu ba sosiedade mantein kalma no fó apoiu ba parte kompetente atu halo investigasaun ba kazu ne’e.

Iha Twitter, Ministru Finansas, Mangala Samaraweera, hateten akontesementu ne’e hanesan “esforsu ne’ebé koordena malu atu oho, destruisaun no asaun
anarkizmu" hodi rezulta vítima ne’ebé maioria laiha kulpa.

Too agora seidauk iha autór ida atu responsabiliza ba atake bomba, maski Departamentu  Defeza Sri Lanka  dehan atake ne’e deskonfia halo husi  grupu iida de’it.

Média Sri Lanka relata deskonfia turista estranjeiru balun mós sai vítima ba esplozaun bomba ne’e.

Tuir informasaun husi Polisia hafoin insidente ne’e konsege kaptura ona ema na’in hitu hodi  halo prosesu indetifikasaun no kontinua buka tuir autór seluk. Dadaun ne’e estadu Sri-Lanka deside estadu desitiu.

Papa Francisco Kondena no Reza ba Vitima Sira

Hafoin akontesimentu, Papa Francisco hamutuk ho sarani rihun resin iha Prasa Saun Pedro Vatikanu, hato’o mensajen Domingu Páskoa no hala’o orasaun ba vítima sira husi atake bombardeiru iha igreja no otél sira iha Sri Lanka.

‘‘Maun alin doben sira, hau aprende ho notísia tristeza husi atake grave ne’ebé ohin loron Páskoa, lori lutu no kanek ba Igreja balun no fatin seluk, iha ne’ebé ema hotu hamutuk iha Sri Lanka. Hau hakarak espresa hau nia proximidade ba komunidade Kristaun ne’ebé hetan problema, bainhira hamutuk hodi halo orasaun, no vítima sira hotu, husi violénsia kruel ida ne’e. Hau fiar ba Maromak, ba sira ne’ebé mate trajikamente no hau reza ba ema kanek sira inklui sira ne’ebé sofre, kauza husi violénsia dramátika ne’e”, hateten Santu Padre.

Akontesimentu nee  hetan reasaun makaas husi lider mundial sira hodi kondena no hatoo profunda solidariedade ba vitima sira. (*/detik)