Prezidente Asosiasaun Majistradu Judisiál Timór-Leste (AMJTL), Antonino Gonçalves hatete, TL laiha akordu estradisaun ho Indonézia atu lori fila timoroan na’in-rua ne’e, maibé kabe ba kompeténsia Estadu rai rua ne’e atu halo negosiasaun hodi haree asuntu ne’e.

Hare ba krime ne’e, autoridade Indonézia mak kaptura sidadaun timoroan ne’e, tanba Timor-Leste la konsege deteta. Tanba ne’e, haree ba área jurídiku, timoroan na’in-rua ne’e, halo krime iha Indonézia. No, haree husi perspetiva, krime ne’e kontinuadu husi área jurídiku Timor-Leste.

“Ema kaer sira na’in-rua iha ne’ebá, lei iha ne’ebá mak aplika”, tenik Antonino, iha servisu fatin, Kaikoli, Kuarta (5/6).

Estadu mak tenke husu para sira mai julga iha ne’e ka julga iha ne’ebá. Estadu tenke diplomasia no intervein para kastigu sira iha ne’ebá labele aplika kastigu ne’ebé Konstituisaun la fó fatin, hanesan prizaun perpétua ho pena morte.

Nia dehan, haree ba prova, Estadu Timór-Leste kaer ona arguidu sira ne’ebé fasilita ka fó sasán ne’e ba sidadaun timoroan na’in-rua ne’e. Tanba ne’e, bele halo diplomasia para bele mai julga iha Timor.

Tanba tratadu estradisaun laiha, bele julga iha Indonézia no kastigu bele mai kumpre iha Timor ka bele iha alternativa seluk. Maibé, Governu mak tenke halo diplomasia.

Sei Haruka Advogadu

Entretantu, Komandante Jerál Polisia Nasionál Timor-Leste (PNTL), Komisáriu Faustino da Costa hateten, to’o agora la hetan dalan hodi aprosima autoridade kompetente sira iha Indonézia kona-ba sidadaun timoroan na’in rua, tanba kazu ne’e tama ona iha prosesu justisa.

Nu’udar instituisaun kompetente, PNTL rasik haruka ona karta ba Governu atu bele buka meiu hodi hetan advogadu própriu ida atu defende sidadaun na’in rua iha Indonézia.

“Ami laiha kompeténsia, maibé ami haruka ona karta ida ba Governu atu buka advogadu ida hodi defende ita-nia sidadaun na’in rua iha Indonézia”, tenik nia, iha Parlamentu Nasionál, Kuarta (5/6).

To’o agora PNTL laiha dalan atu aprosima ho Polisia Indonézia, ne’e duni kompeténsia tomak iha parte polítika nian, liu husi diplomasia Estadu rai rua nian.

iha fatin hanesan, Prezidente Komisaun B, Parlamentu Nasionál, Deputadu Adérito Hugo da Costa, husu ba PNTL atu kontinua reforsa servisu iha fronteira.

Kona-ba prosesu justisa ne’ebé la'o daudaun, hasoru sidadaun na’in rua ne’e entrega ba Governu TL mak sei rezolve. Maibé hanesan ema polítiku nia sujere atu kontinua hadi’a fallansu ne’ebé akontese iha fronteira.