“Loos duni dezenvolvimentu seidauk la’o hotu ho di'ak, hanesan PNDS ne’e seidauk, loos duni”, dehan nia liu husi komísiu polítika kampaña aberta iha Maliana,Tersa (27/06).
Liu husi kompromisu polítiku, Lider CNRT ne’e dehan, bainhira povu fó fiar atu ukun iha períodu 2017 -2022 kada semana sei mai hakbesik aan ba povu iha baze hodi hasai husi kiak no mukit. Atu dezenvolve TL ne’e la'ós atu huu de’it maibé tenke la’o neineik.
Tanba ne’e, Programa CNRT sei kontinua ho obra boot ne’ebé oras ne’e daudaun la’o namanas hela bainhira kaer ukun.
“CNRT la hakfodak ho kritika sira ne’ebé mai husi ema balun dehan gasta no estraga osan de’it, sira ne’ebé kritika ne’e tanba hanoin sempit sekali”, dehan Xanana.
Eis Primeiru Ministru ne'e hatutan, Partidu seluk ne’ebé kritika obra boot harii husi CNRT ne’e lahatene agradese, hatene kritika tanba lahatene halo, maibé lahatene halo.
Atu dezenvolve TL, nia dehan,tenke investe uluk iha Estrada, aeroportu, portu atu dada investidór mai investe iha TL.
Iha fatin hanesan Prezidente Konsellu Diretiva Nasionál (CDN), Dionísio Babo dehan so partidu CNRT maka bele hadi'a no garante povu nia moris.
Tanba ne’e, nia husu ba populasaun tomak atu labele hili sala.
CNRT sei kontinua hametin pás no estabilidade iha parte seguransa no defeza, relasaun internasionál, kontinua hadi'a infraestrutura bázika, kria kampu servisu ba joven inklui hametin governasaun di’ak hodi hakbesik prestasaun servisu ba povu liu husi investe iha kapitál umanu, sosiál no governasaun lokál no justisa.
Povu Suku 14 Apoiu Xanana
Populasaun husi Munisípiu Bobonaru kompostu husi Postu Administrasaun neen, no Suku 14 fó apoiu ba Xanana Gusmão atu kontinua kaer ukun hodi dezenvolve TL.
Reprezenta Xefe Suku 14 iha Munisípiu Bobonaru Domingos Belo hatete,populasaun Suku 14 voluntariamente hakarak apoiu Xanana Gusmão liu husi partidu CNRT atu kaer ukun hodi hasai povu husi kiak no mukit.
Suku 14 kompostu husi Suku Oe-Leu, Lourba, Lour, Tapo, Maleubu, Kolimau, Ilatlaun, Soelesu, Karbau, Holsa, Kova, Aidabalete no Manapa.
Valoriza Veteranu no Edukasaun
Entretantu, Komisáriu Polítika Nasionál CNRT Miguel Manetelo afirma, so úniku CNRT mak bele valoriza veteranu sira hodi hetan sira nia diretu.
Tanba ne’e, nia husu ba militante no simpatizante inklui populasaun TL labele duvida vota ba CNRT.
Harii Banku ba Setór Privadu
Iha kampaña ba dala hitu, Prezidente CNRT Xanana Gusmão dehan sei kria banku ida ba setór privadu liu husi servisu hamutuk ho investidór osan boot sira iha rai li'ur hodi fó kréditu ba setór privadu sira.
Banku ne’e nia informa, iha ona lisensa atu tau banku iha kada munisípiu hodi fó kréditu ba setór privadu sira.
CNRT sei kontinua Dezenvolve setór finanseiru hodi fasilita setór privadu no promove nafatin dezenvolvimentu setór privadu nasionál inklui haburas investimentu setór privadu.
CNRT Enkoraja nafatin dezenvolvimentu auto empregu, empreza ki'ik no médiu atu hametin no habelar partisipasaun feto no juventude iha área dezenvolvimentu hotu.
