Ne’e duni, Prezidente Partidu Libertasaun Populár (PLP), Taur Matan Ruak, husu Komisaun Nasionál Eleisaun (CNE) atu tau atensaun ba partidu CNRT, ne’ebé uza atributu veteranu nian.

“Imi (CNE) lakohi atu tau atensaun, maka ha’u mós sei lori fali ha’u nian mai hodi halo kampaña. Tanba iha Timor boña mean ami rua de'it. Ida iha fitun no ida laiha”, dehan nia, iha kampaña kampaña diálogu, iha Suai-Mau katar, horisehik.

Tanba ne’e, nia Eis Jenerál F-FDTL ne’e hatete, agora lakohi ona atu uza xapeu boña mean tanba funu hotu ona, uza tan atu halo funu hasoru sé.

“Boña mean ne’e ha'u brani tau iha funu, maibé funu hotu tiha ha’u tau moe fali, Husik maun Xanana mak tau de'it ona”, dehan Taur.

Eis-Prezidente Repúblika ne’e mós husu atu kuidadu ho manipulasaun komputadór.

Nia esplika, bele na'ok iha komputadór. Bainhira fiskais husi munisípiu ba iha suku ne’e di'ak maibé nasionál ne’e problema. Nia fó ezemplu, iha votu 108 sira hasai tiha zero hela de'it mak 18.

Nia dehan, problema sira hanesan ne’e akontese iha Nasaun Unidas, Prezidente Donald Trump to’o agora sei iha akuzasaun ba ida ne’e, tanba deskonfia na’ok iha komputadór.

Ne’e duni, nia husu atu tau atensaun makaas ba fiskais sira atu alerta kedan, tanba dalan ne'ebé atu halakon mak eleisaun.