Iha Sesta (10/02), komitiva husi UE hasoru-malu ho lideransa Sekretariu Tekniku Administrasaun Eleitoral (STAE) hodi konkretiza nota intendimentu ne’ebé MAE ho MNEK asina ona ho UE.

“UE (iha) interese boot teb-tebes atu halo observasaun ba ita-nia prosesu eleitoral, liliu ba eleisaun jerais ne’ebé mak sei akontese iha fulan Marsu, Abril no Julho,” dehan Diretór STAE, Acilino Manuel Branco hafoin sorumutu.

Nia dehan, ekipa husi UE mai hodi halo kordenasaun tekniku nune’e bele fó akreditasaun ba delegasaun misaun observasaun ninian ne’ebé mak sei fahe ba ekipa 2 ka 3.

“Ekipa balun kuaze 24 pessoas sei to’o iha dia 11 Fevereiru no ekipa restu sei mai iha semana oin, ne’e mak hamutuk 40 pessoas. Ikus liu mak ekipa ida kuaze 13 pessoas, sira ne’e balun deputadu husi UE ninian,” informa Diretór ne’e.

Entretantu, nia dehan, STAE mós koordena hela oinsa atu fó briefing ruma ba sira, liliu atu esplika ba sira kona-ba papel observadór to’o iha ne’ebé, no sira presiza hatene lokalizasaun sentru votasaun sira.

“Sira-nia hakarak la’os atu halo nivel observasaun iha nasional, kapital de’it maibé sira mós hakarak ba halo observasaun iha area rurais. Tanba uluk sira hala’o ona iha Munisipiu Lautem, Ermera no Oecusse, entaun sira hakarak ba haree fila fali prosesu sira ne’e hotu,” katak nia.

Dauadun ne’e, nia dehan, STAE fó mós resposta ba delegasaun husi kontinente sira seluk, liliu husi Australia, Estadu Unidus Amerika no seluk tan.

“Ita rasik mak hato’o mós kontakto liu husi MNEK konvida tan maluk internasional sira seluk atu bele observa ita-nia prosesu eleisaun,” katak nia.

Aleinde internasionál, nia dehan, STAE mós simu pedidu husi organizasaun nivel nasionál sira ONG no organizasaun relijioju sira.

“Ami despaisu ona (sira-nia pedidu) ba tekniku sira par fó ona akreditasaun. Tanba prosesu observasaun hahú husi agora. Preparasaun, kampaña, votasaun no mós kontajen rezultadu,” nia esplika.