PM Rui hatete, enkontru ho PR Taur ne’e atu hato’o kona-ba preparasaun ba eleisaun jeral nian.
“Hato’o kona-ba preparasaun nivel Governu nian ba eleisaun Prezidensial nian, CNE, STAE no orgaun eleitór sira,” dehan PM Rui ba jornalista sira hafoin sorumutu ho PR Taur iha Palasiu Prezidensial Nicolau Lobato, Aitarak Laran-Dili, Kuarta (01/02).
Kona-ba seguransa, PM Rui hatete, nia parte informa mós asuntu seguransa ba eleisaun Prezidensial 20 Marsu no preparasaun ba seremonia tomada posse ba Prezidente Republika foun.
“Hamutuk mós ho Prezidente haree oinsa atu Governu prepara ona seremonia tomada posse ba PR foun ne’ebé sei hala’o iha 20 Maiu, komemora mós aniversariu Independensia ba 15 nian,” katak nia.
Tuir nia, eleisaun ba tinan ne’e sei susesu, tanba iha tinan kotuk eleisaun Suku mós la’o ho susesu.
“Iha tinan kotuk ita halo eleisaun Suku nian ho susesu, no mós ita-nia sidadaun hatudu maturnidade di’ak. Espera katak 2017 mós sei la’o hanesan ne’e, povu Timor-Leste hatudu nia ezemplu di’ak ba nia an rasik no ba mundu tomak liu husi eleisaun ne’ebé liu tiha ona,” dehan nia.
